सध्याच्या डिजिटल युगात ऑनलाइन फसवणुकीचे प्रमाण मोठ्या प्रमाणावर वाढले आहे. मोबाईल कॉल, मेसेज आणि सोशल मीडियाच्या माध्यमातून सर्वसामान्यांची फसवणूक करण्याचे नवनवीन मार्ग सायबर गुन्हेगार शोधत असतात. सरकार आणि पोलीस प्रशासनाकडून वारंवार सतर्कतेचे आवाहन केले जात असले, तरी अनेकदा लोक या जाळ्यात अडकतात. मात्र, काही जण आपल्या प्रसंगावधानाने या भामट्यांनाच उलट धडा शिकवतात. असाच काहीसा मजेशीर आणि तितकाच प्रेरणादायी अनुभव मराठी चित्रपटसृष्टीतील लोकप्रिय अभिनेता सिद्धार्थ चांदेकर याने नुकताच सोशल मीडियावर शेअर केला आहे.
सिद्धार्थ चांदेकरला ‘महानगर गॅस’चा प्रतिनिधी असल्याचे सांगून एका व्यक्तीने फोन केला होता. हा कॉल फसवणुकीच्या उद्देशाने करण्यात आला असावा, असा संशय सिद्धार्थला सुरुवातीलाच आला. समोरची व्यक्ती त्याच्याकडून काही वैयक्तिक माहिती घेण्याचा प्रयत्न करत होती. जेव्हा सिद्धार्थने त्यांच्याशी संवाद साधला, तेव्हा समोरून सांगण्यात आले की तिथे मराठी बोलणारे कोणीही उपलब्ध नाही. यावर सिद्धार्थने अत्यंत चपखल उत्तर देत विचारले की, महानगर गॅस जो प्रामुख्याने महाराष्ट्रात सेवा देतो, तिथे मराठी भाषा कशी चालत नाही?
सिद्धार्थ एवढ्यावरच थांबला नाही, तर त्याने त्या कॉलरची चांगलीच फिरकी घेतली. त्याने समोरच्या व्यक्तीला एक अट घातली की, जर त्याने एक मराठी वाक्य बोलून दाखवले तरच तो पुढील माहिती देईल. समोरच्या व्यक्तीने मराठी येत नसल्याचे सांगितल्यावर सिद्धार्थने त्याला मदत करण्याची तयारी दर्शवली आणि स्वतः उच्चारलेले शब्द मागे बोलण्यास सांगितले. यावेळी सिद्धार्थने आपल्या आगामी किंवा नुकत्याच गाजलेल्या ‘क्रांतीज्योती विद्यालय मराठी माध्यम’ या चित्रपटाचा संदर्भ वापरला. त्याने त्या व्यक्तीला चित्रपटातील लोकप्रिय गाणे ‘स्वर्गात आकाशगंगा’ याच्या ओळी म्हणायला लावल्या.
स्वर्गात आकाश गंगा.. अभिनेता सिद्धार्थ चांदेकरने फ्रॉड कॉल करणाऱ्याची घेतली शाळा pic.twitter.com/r1JegH6XLy
— Saamana Online (@SaamanaOnline) March 11, 2026
हा सर्व प्रकार सिद्धार्थने रेकॉर्ड करून सोशल मीडियावर शेअर केला आहे. हा व्हिडिओ सध्या इंटरनेटवर तुफान व्हायरल होत असून नेटकऱ्यांना आपले हसू आवरणे कठीण झाले आहे. सिद्धार्थने ज्या पद्धतीने आपली हुशारी वापरून त्या फ्रॉड कॉलरची शाळा घेतली, त्याचे सर्वत्र कौतुक होत आहे. या घटनेतून सिद्धार्थने केवळ मनोरंजनच केले नाही, तर अशा संशयास्पद कॉल्सना कसे हाताळावे, याचा एक उत्तम वस्तुपाठही सर्वांसमोर मांडला आहे.
