इंडियन प्रीमियर लीगचा (IPL) आगामी हंगामा सुरू व्हायला अवघे 11 दिवस उरले आहेत. सर्व संघांची जोरदार तयारी सुरू असून विजेतेपदासाठी सर्वांनी कंबर कसली आहे. या सगळ्या दरम्यान टीम इंडियाचा माजी कर्णधार व माजी फिरकीपटू अनिल कुंबळे याने कोलकाता नाईट रायडर्सच्या प्रशासनावर संताप व्यक्त केला आहे. कुंबळेने एका वृत्त वाहिनीशी बोलताना कोलकाता नाईट रायडर्सला फटकारले आहे.
कोलकाता नाईट रायडर्सने कर्णधार श्रेयस अय्यर आणि धडाकेबाज सलामीवीर फिल सॉल्ट यांना रिलीज करण्याचा निर्णय घेतला आहे. केकेआरच्या या धक्कादायक निर्णयावर आता क्रिकेट वर्तुळातून प्रतिक्रिया उमटत आहेत. टीम इंडियाचा माजी दिग्गज फिरकीपटू अनिल कुंबळेने यावर आपली नाराजी व्यक्त केली असून, केकेआरचा हा निर्णय चुकीचा असल्याचे म्हटले आहे.
”ज्या कर्णधाराने तुमच्या संघाला आयपीएलचे विजेतेपद मिळवून दिले, त्यालाच संघातून मुक्त करणे हे अनाकलनीय आहे. श्रेयस अय्यरने गेल्या हंगामात संघाचे उत्तम नेतृत्व केले होते. तसेच, फिल सॉल्टने आपल्या स्फोटक फलंदाजीने संघाला अनेकदा भक्कम सुरुवात करून दिली होती. या दोन महत्त्वाच्या खेळाडूंना लिलावापूर्वी संघात न ठेवणे ही केकेआरची मोठी ‘घोडचूक’ ठरू शकते, असे मत कुंबळेने व्यक्त केले आहे.
