समृध्दी महामार्गावर अपघातसत्र सुरूच आहे. बुलढाण्यात समृद्धी महामार्गावरील भीषण अपघात ताजा असतानाच आज पुन्हा एकदा मुंबई नागपूर समृद्धी महामार्गावर कारचा भीषण अपघात झाल्याची घटना समोर आली आहे. हुंडाईच्या वेरना कार रस्त्याच्या दुभाजकाला जोरदार धडकल्याने झालेल्या अपघातामध्ये आई-वडीलांसह मुलगा अशा तीन जणांचा जागीच मृत्यू झाला आहेत. या महामार्गावर बरेच अपघात होऊन अनेकांचे बळी गेल्याने सुरक्षेचा प्रश्न अधोरेखित झाला आहे.
मुंबई नागपूर समृद्धी महामार्गावर हुंडाईच्या वेरना कारने रस्त्याच्या दुभाजकाला जोरदार धडकल्याने झालेल्या भीषण अपघातात तीन जणांचा मृत्यू झाला आहे. चालकाचे वाहनावरील नियंत्रण सुटून कोपरगाव तालुक्यातील धोत्रे गावाजवळ हा अपघात झाला. मोहम्मद जावेद अख्तर (58) (वडील) शमीम बेगम मोहम्मद अख्तर (51) (आई) व अक्रमुद्दिन मोहम्मद जावेद (22) अशी मृतांची नावे आहेत. तीनही मृतदेह कोपरगाव ग्रामीण रुग्णालयात नेण्यात आले आहेत.
पोलिसांनी दिलेल्या माहितीनुसार, मुंबई नागपूर समृद्धी महामार्गावरील कोपरगाव तालुक्यातील धोत्रे गावाच्या परिसरात सकाळी साडेअकराच्या दरम्यान हा अपघात झाला. कारमध्ये तीन जण प्रवास करत होते. नांदेडहून मुंबईच्या दिशेने भरधाव वेगाने कार जात असताना धोत्रे गावाच्या परिसरात चालकाचा गाडीवरील ताबा सुटला व अनियंत्रित झालेली कार रस्त्याच्या कडेला असलेल्या दुभाजकावर जाऊन धडकली. मुलगा अक्रमुद्दिन हा गाडी चालवत होता असे कळते. या अपघातामध्ये गाडीचं देखील मोठं नुकसान झालं आहे.
