महिलांना संधी मिळाली पाहिजे. राज्यात महिला मुख्यमंत्री व्हावा असे सर्वांना वाटते. पण ते अद्याप शक्य झालेले नाही. कित्येक वर्षे मलाही मुख्यमंत्री व्हावं वाटतं आहे. पण तो योग कुठेही जुळून आलेला नाही, अशा भावना उपमुख्यमंत्री अजित पवार यांनी आज व्यक्त केल्या.
गौरवशाली महाराष्ट्र महोत्सव-2025मध्ये पद्मश्री अनुराधा पौडवाल, ज्येष्ठ पत्रकार राही भिडे, ज्येष्ठ अभिनेत्री सोनाली कुलकर्णी, पार्श्वगायिका बेला शेंडे, अर्जुन पुरस्कार विजेत्या कबड्डीपटू अभिलाषा म्हात्रे, अर्जुन पुरस्कार विजेत्या धावपटू ललिता बाबर, अर्जुन पुरस्कार विजेत्या नेमबाज राही सरनोबत यांचा उपमुख्यमंत्री अजित पवार यांच्या हस्ते शाल, पुष्पगुच्छ आणि सन्मानचिन्ह देऊन सन्मान करण्यात आला. त्या वेळी अजित पवार बोलत होते.
