मारहाणप्रकरणी भाजप आमदार राम कदम आरोपी असलेल्या खटल्याचे व्हिडीओ रेकार्डिंग करण्याचे सत्र न्यायालयाने तोंडी आदेश देऊनही त्याची अंमलबजावणी अद्याप झालेली नाही. सरकारकडे त्याबाबतचा प्रस्ताव पाठवण्यात आला असून आवश्यक यंत्रणा नसल्यामुळे व्हिडीओ रेकार्डिंग केली जात नसल्याची नोंद घेत सत्र न्यायालयाने या खटल्याची सुनावणी
25 जून रोजी ठेवली आहे.
भाजप आमदार राम कदम यांनी 2014 साली गौतम बुद्ध यांच्या अस्थी त्यांच्या मतदारसंघात घेऊन येणार असल्याची जाहिरात केली. आंबेडकर चळवळीतील कार्यकर्ता रोहित तांबे यांनी सदर घटनेची शहनिशा न करता जनतेची दिशाभूल करीत असल्याचे सांगून पोलीस ठाण्यात तक्रार दिली. त्यावर रोहित याचे अपहरण करून त्याला मारहाण करण्यात आली. याप्रकरणी पार्कसाईट पोलीस ठाण्यात आमदार राम कदम व इतर काही जणांविरोधात अ‍ॅट्रोसिटीअंतर्गत गुन्हा दाखल करण्यात आला आहे. या खटल्याचे व्हिडीओ रेकार्डिंग करण्यात यावे, असा अर्ज फिर्यादी तर्फे अ‍ॅड. विनोद सातपुते यांनी दाखल केला आहे. या खटल्यावर अतिरिक्त न्यायाधीश एस. आर. नवंदर यांच्या समोर सुनावणी घेण्यात आली.
