सांगलीच्या सिव्हिल हॉस्पिटल रोडवर एसटी बसच्या चाकाखाली सापडून दुचाकीस्वार महाविद्यालयीन तरुणीचा दुर्दैवी मृत्यू झाला. सांगली शहरातील जय मातृभूमी व्यायाम मंडळासमोर सकाळी साडेदहा वाजण्याच्या सुमारास हा अपघात झाला.
शर्वरी राजकुमार कुलकर्णी (वय 21, रा. हरिपूर, सांगली) असे अपघातात मृत्यू झालेल्या मुलीचे नाव आहे. मयत शर्वरी ही सांगलीतील एका महाविद्यालयात बीसीएचे शिक्षण घेत होती. सकाळी शर्वरी नेहमीप्रमाणे महाविद्यालयाकडे जात असताना सिव्हिल रोडवर मुंबई-जमखंडी बसच्या मागील चाकाखाली सापडून तिचा मृत्यू झाला. घटनेनंतर काही अंतरावर जाऊन बस थांबली. घटनेनंतर अपघातस्थळी मोठी गर्दी झाली होती. घटनेची माहिती मिळताच शहर पोलिसांनी मृतदेह शासकीय रुग्णालयात पाठवला. शर्वरीच्या वडिलांचा मृत्यू झाला असून, आई आणि बहिणीसोबत ती हरिपूर येथे राहात होती.
