ऑस्ट्रेलियन क्रिकेटसाठी दिलासा देणारी आणि स्फूर्तिदायक बातमी समोर आली आहे. माजी दिग्गज फलंदाज डॅमियन मार्टिनला मेंदूज्वराशी झुंज देत असताना काही दिवसांपूर्वी औषधांनी दिलेल्या बेशुद्ध अवस्थेत (कृत्रिम कोमा) ठेवण्यात आला होता. आता तो कोमातून बाहेर आला असून त्याच्या प्रकृतीत सातत्याने सुधारणा होत आहे. 54 वर्षीय मार्टिन सध्या गोल्ड कोस्ट येथील रुग्णालयात वैद्यकीय देखरेखीखाली असून त्याची प्रकृती स्थिर असल्याचे सांगितले जाते.
मार्टिनचा जवळचा मित्र आणि माजी यष्टिरक्षक अॅडम गिलख्रिस्टने आनंदाची बातमी देताना सांगितले की, मार्टिन आता बोलू लागला आहे आणि उपचारांचा सकारात्मक परिणाम दिसतो आहे. डॉक्टर लवकरच त्याला अतिदक्षता विभागातून इतर वॉर्डमध्ये हलवू शकतात. तो वेगात बरा होत असल्याचे हे शुभसंकेत आहेत.
दरम्यान, त्याच्या पत्नीने वैद्यकीय पथकाचे आभार मानत, ‘आशेचा किरण पुन्हा उजळला आहे,’ अशी भावना व्यक्त केली. हा संघर्षावर मात करण्याचा क्षण क्रिकेटप्रेमींना नवी उमेद देणारा आहे.
