हिंगोलीतील वसमत शहरात शनिवारी भीषण अपघाताची घटना घडली. माती वाहून नेणारा डंपर भरबाजारात घुसला आणि नागरिकांना चिरडत रिक्षाला धडकला. या अपघातात दोघांचा जागीच मृत्यू झाला तर सहा जण गंभीर जखमी झाले. या घटनेनंतर परिसरात एकच खळबळ उडाली.
वसमत शहरातील मदिना चौकात ही घटना घडली. वीटभट्टीसाठी माती वाहतूक करणारा डंपर बाजारात घुसला. नागरिकांना चिरडत रिक्षाला धडक देत डंपर थेट दुकानात शिरला. या अपघातात 5 ते 6 जण चिरडले गेले तर दोघांचा मृत्यू झाला. जखमींना उपचारासाठी वसमत येथील शासकीय रुग्णालयात दाखल करण्यात आले आहे. अपघाताची माहिती मिळताच पोलीस आणि प्रशासकीय पथक घटनास्थळी दाखल झाले.
