होळी साजरी करताना एका तरुणीने केलेली स्टंटबाजी तिच्या चांगलीच अंगलट आली आहे. चालत्या स्कुटीवर उभे राहून टायटॅनिकची पोझ देत त्याचा रील करून सोशल मीडियावर शेअर करणाऱया तरुणीला वाहतूक पोलिसांनी इंगा दाखवला आहे. वाहतूक पोलिसांनी तिला 33 हजारांचा दंड ठोठावला आहे.
उत्तर प्रदेशातील नोएडा येथील ही घटना आहे. ज्यामध्ये एक तरुण स्कुटी चालवताना दिसत आहे, तर तरुणी त्याच्यामागे सीटवर उभी राहून रील बनवताना दिसत आहे. ती स्कुटी चालवणाऱया तरुणाला रंग लावत आहे. तसेच ‘टायटॅनिक’ची पोझ देताना दिसते. परंतु पुढच्याच क्षणी तो तरुण एक कार समोर आल्यामुळे अचानक ब्रेक मारतो आणि ती मुलगी रस्त्यावर जोरात आपटते. एवढे होऊनही तरुणी हसताना व्हिडीओत दिसतेय.
हा व्हिडीओ काही मिनिटांतच सोशल मीडियावर व्हायरल झाला. व्हिडीओला लाखो ह्यूज आणि कमेंट मिळाले. सोशल मीडियावर व्हूज मिळवण्यासाठी हा स्टंट असल्याची टीका नेटिजन्सनी केली. व्हिडीओची गंभीर दखल घेत नोएडा वाहतूक पोलिसांनी वाहतुकीच्या नियमांचे उल्लंघन केल्याप्रकरणी तरुणीला 33 हजार रुपयांचा दंड ठोठावला आणि या चलनाचा फोटो शेअर केला. तसेच अशा घटना आढळल्यास हेल्पलाईन नंबरवर कळवण्याचे आवाहन केले.
