मकर संक्रांतीच्या मुहूर्तावर बुधवारी हिंदुस्थान-न्यूझीलंड हे संघ दुसऱ्या वन डे क्रिकेट सामन्यात भिडणार आहेत. सलामीच्या लढतीत शंभराव्या षटकांपर्यंत रंगलेल्या लढतीत यजमान हिंदुस्थानने बाजी मारत नववर्षाचा विजयारंभ केला. आता राजकोटमध्ये होणाऱ्या उभय संघांमधील लढतीत कोणाचा पतंग कटणार, याकडे तमाम क्रिकेटप्रेमींच्या नजरा असतील. टीम इंडिया लागोपाठच्या विजयासह तीन सामन्यांची मालिका आधीच खिशात घालण्यासाठी आतुर असेल. दुसरीकडे पाहुण्या संघावर मालिकेतील अस्तित्वाची संक्रांत आली असून त्यांच्यासाठी ही लढत ‘जिंका किंवा मरा’ अशी असेल.
पहिल्या सामन्यात पराभव पत्करावा लागला असला तरी न्यूझीलंडसाठी दिलासादायक बाब म्हणजे त्यांनी हिंदुस्थानला 49.5 षटकांपर्यंत झुंज देत सामना खेचून नेला. जर अशीच लढत पुन्हा देता आली आणि कुठून तरी 20 धावांची भर घालता आली तर अनुभवहीन संघ असूनही ते पूर्ण ताकदीच्या हिंदुस्थानी संघाला धक्का देऊ शकतात. दुसरीकडे, हिंदुस्थानलाही हे मान्य करावे लागेल की, फलंदाजीतील सर्वोत्तम कामगिरी न करतादेखील त्यांनी सामना जिंकला. न्यूझीलंडला 300 धावांच्या आत रोखण्यासाठी हिंदुस्थानी गोलंदाजांनी बऱ्याच अंशी प्रभावी मारा केला, मात्र लक्ष्याचा पाठलाग करताना विराट कोहली बाद झाल्यानंतर निर्माण झालेल्या अडचणी हिंदुस्थानी संघाला अस्वस्थ करणाऱ्या ठरल्या. तरीही हिंदुस्थानला आत्मविश्वास आहे की, नाणेफेक हरली तरी आपल्या सर्वोत्तम फॉर्मच्या जोरावर मालिका जिंकणे शक्य आहे. अखेरच्या वन डेत प्रयोग करण्याची संधी मिळेल, अशी अपेक्षा.
टॉसच ठरणार बॉस
राजकोटच्या नव्या स्टेडियमवर चार वन डे सामने झाले आहेत. येथे अद्याप कोणत्याही संघाला प्रथम फलंदाजी करताना सातत्यपूर्ण यश मिळालेले नाही. मात्र आधी गोलंदाजी करत असाल तर प्रतिस्पर्ध्याला 350 धावांच्या आत रोखा. विराट कोहली आणि डॅरिल मिचेल सध्या आपल्या संघांचे सर्वाधिक फॉर्मात असलेले फलंदाज आहेत. पहिल्या वन डेत दोघेही शतकाच्या जवळ पोहोचले होते. कोहलीवर संघाचा दबाव कमी असल्याने तो कारकीर्दीच्या उत्तरार्धात मोकळेपणाने खेळताना दिसतो आहे.
अर्शदीपला संधी मिळण्याची शक्यता
दुखापतग्रस्त वॉशिंग्टन सुंदरच्या जागी संघात आयुष बदोनीचा समावेश करण्यात आला आहे. स्थानिक क्रिकेटमधील प्रभावी पार्ट-टाइम गोलंदाजी हे त्यामागील प्रमुख कारण मानले जाते. मात्र नितीश कुमार रेड्डी आधीच संघात असल्याने बदोनीला अंतिम 11 मध्ये संधी मिळेल की नाही, हे परिस्थिती ठरवेल. तसेच अर्शदीप सिंग प्रसिध कृष्णाच्या जागी संघात येऊ शकतो.
न्यूझीलंडच्या फलंदाजीवर मदार
न्यूझीलंडला सामन्यात टिकून राहण्यासाठी डॅरिल मिचेलकडून आणखी मोठी खेळी अपेक्षित आहे. हेन्री निकोल्स सलामीला चांगले जुळवून घेताना दिसत असून त्यामुळे मधल्या फळीत डॅरिल मिचेलसाठी जागा तयार झाली आहे. लॉकी फर्ग्युसन आणि आदित्य अशोक यांचा वन डेतील अनुभव फारसा प्रभावी नसला तरी न्यूझीलंड त्यांच्यावर विश्वास ठेवू शकतो. जेडन लेनॉक्सचा डावखुरा फिरकी गोलंदाज हा दुसरा पर्याय आहे.
हिंदुस्थानचेच पारडे जड
वडोदरामध्ये दवाचा फारसा परिणाम नव्हता, मात्र थंड हवामानामुळे खेळपट्टी थोडी जलद झाली होती. आधी फलंदाजी करत डाव कमाल मर्यादेपर्यंत नेल्यास राजकोटमध्ये टॉस फार मोठा घटक ठरणार नाही. मागील 13 वन डेंपैकी ही पहिलीच वेळ होती, जेव्हा हिंदुस्थानच्या गोलंदाजांना पॉवर प्लेमध्ये एकही विकेट मिळाली नाही. हिंदुस्थानविरुद्ध किमान 20 सामने खेळलेल्या विदेशी संघांमध्ये न्यूझीलंडचे जय-पराजयाचे रेकॉर्ड 1-4 असे सर्वात खराब आहे. न्यूझीलंडने हिंदुस्थानात केवळ 8 विजय मिळविले असून तब्बल 32 पराभव पत्करले आहेत. याचाच अर्थ राजकोटमध्ये हिंदुस्थानचेच पारडे जड असणार.
संभाव्य अंतिम संघ
हिंदुस्थान ः शुभमन गिल (कर्णधार), रोहित शर्मा, विराट कोहली, श्रेयस अय्यर, के. एल. राहुल (यष्टिरक्षक), नितीश कुमार रेड्डी/आयुष बदोनी, रवींद्र जाडेजा, हार्दिक पंडय़ा, कुलदीप यादव, अर्शदीप सिंग, मोहम्मद सिराज.
न्यूझीलंड ः डेव्हॉन कॉनवे, हेन्री निकोल्स, विल यंग, डॅरिल मिचेल, (यष्टिरक्षक), ग्लेन फिलिप्स, मायकेल ब्रेसवेल (कर्णधार), क्रिस्टियन क्लार्क, काइल जेमिसन, जॅक फॉल्क्स, आदित्य अशोक/जेडन लेनॉक्स.
