इस्रायल युद्धविरामासाठी तयार असल्याचा दावा अमेरिकेचे राष्ट्राध्यक्ष डोनाल्ड ट्रम्प यांनी केला होता. तसेच हमासनेही हा प्रस्ताव स्वीकारावा अन्यथा त्याचे भयंकर परिणाम होतील असा इशाराही दिला होता. त्यानंतरही इस्रायलने गाझापट्टीत हवाई हल्ला केला तसेच अंधाधुंद गोळीबार केला. रात्रभर करण्यात आलेल्या या हल्ल्यात 94 पॅलेस्टिनींचा मृत्यू झाला. यात मदत केंद्र तसेच रुग्णालयातून परतणाऱ्या नागरिकांचाही बळी गेल्याचा दावा गाझापट्टीतील आरोग्यमंत्रालयाने केला आहे.
