मुंबई हायकोर्टाचे न्यायमूर्ती अतुल चांदूरकर यांना सर्वोच्च न्यायालयात न्यायमूर्ती म्हणून बढती देण्यात आली आहे. सुप्रीम कोर्टाच्या कॉलिजियमने तशी शिफारस केली आहे. कर्नाटक उच्च न्यायालयाचे मुख्य न्यायाधीश एन.व्ही. अंजारिया, गुवाहाटी उच्च न्यायालयाचे मुख्य न्यायाधीश विजय बिश्नोई यांनाही न्यायमूर्ती म्हणून बढती देण्याची शिफारस करण्यात आली आहे. सर्वोच्च न्यायालयाचे सरन्यायाधीश संजीव खन्ना, न्यायमूर्ती अभय ओक आणि न्यायमूर्ती हृषीकेश रॉय यांच्या निवृत्तीनंतर सर्वोच्च न्यायालयात न्यायाधीशांच्या तीन रिक्त पदांसाठी न्यायमूर्तींच्या नावाची शिफारस करण्याचा निर्णय कॉलिजियमने घेतला. सरन्यायाधीश भूषण गवई यांच्या अध्यक्षतेखालील पाच सदस्यीय कॉलेजियमची बैठक नुकतीच पार पडली त्यावेळी कर्नाटक उच्च न्यायालयाचे मुख्य न्यायमूर्ती एन.व्ही. अंजारिया, गुवाहाटी उच्च न्यायालयाचे मुख्य न्यायमूर्ती विजय बिश्नोई आणि मुंबई उच्च न्यायालयाचे न्यायमूर्ती अतुल चांदूरकर यांच्या नावाची शिफारस करण्यात आली. त्याबाबतचे परिपत्रक आज सोमवारी प्रसिद्ध करण्यात आले.
