आंबेगाव तालुक्यातील चांडोली खुर्द येथे बिबट्याने दुचाकीस्वारावर हल्ला केल्याची घटना ताजी असतानाच काठापूर बुद्रुक येथे अष्टविनायक मार्गावरून जाताना दुचाकी वर बिबट्याने केलेल्या हल्ल्यात महिला जखमी झाली असून महिलेच्या पायाला बिबट्याचा दात लागला आहे. महिलेवर उपचार सुरू आहे, सहा महिन्यापूर्वी शासनाने बिबट्याच्या हल्ल्या संदर्भात केलेली कमेटी नक्की काय काम करते असा प्रश्न निर्माण झाला आहे.
काठापूर बुद्रुक ता. आंबेगाव येथे ओझर रांजणगाव अष्टविनायक महामार्गावर जयश्री पंकज करंडे व त्यांचा भाचा ओम एरंडे हे पारगाव येथुन काठापूर बुद्रुक येथे आपल्या घरी जात असताना बारवेचा ओढा या ठिकाणी दबा धरून बसलेल्या बिबट्याने मोटरसायकलवर हल्ला केला. यामध्ये जयश्री पंकज करंडे यांच्या पायाला बिबट्याचा दात लागला असून बिबट्याच्या हल्यामुळे मोटरसायकलवरुन त्या पडल्याने जयश्री करंडे या जखमी झाल्या आहेत. त्यांना पारगाव येथे खाजगी रुग्णालयात प्रथमोपचार केले त्यानंतर उपजिल्हा रुग्णालयात उपचार करण्यात आले. तेथुन पुणे येथे यशवंतराव चव्हाण रुग्णालय येथे उपचार करण्यासाठी पाठविण्यात आले आहे. काठापुर परिसरात परिसरात बिबट्या मोठ्या प्रमाणात दिसू लागला असुन सध्या उस तोडणी सुरू आहे त्यामुळे बिबट्याचे नागरिकांना दर्शन होत आहे. त्यामुळे या ठिकाणी पिंजरा लावावा अशी मागणी ग्रामस्थांनी केली आहे. बारमाही बागायती असणाऱ्या या भागात व उस क्षेत्र जास्त असल्याने बिबट्याचेही वास्तव या ठिकाणी जास्त आहे नागरिकांनी सावध राहणे गरजेचे आहे.
आंबेगाव तालुक्यामध्ये मोठ्या प्रमाणावर उसाचे क्षेत्र आहे. त्यामुळे या परिसरात मोठ्या प्रमाणात बिबट्याचे वास्तव्य आहे. ऊस तोडणी सुरू झाल्यामुळे त्यांचा रहिवास असलेला ऊस क्षेत्र तोडणी मुळे कमी होत चालले आहे, त्यामुळे ते सैरभैर होऊन बिबटे वारंवार नागरिकांना दिसत असतात. पाळीव कुत्रे,पाळीव प्राणी, लहान वासरावर या बिबट्यांचे हल्ले वारंवार होत असतात. बिबट्या प्राण्यांबरोबरच आता माणसांनावरही हल्ला करू लागला असून माणसांवर हल्ले वाढले आहेत. सलग दोन दिवसातील हा दुसरा हल्ला झाला आहे त्यामुळे बिबट्याच्या बाबतीत नागरिकांमध्ये भितीचे, दहशतीचे वातावरण निर्माण आहे. प्रशासन याकडे लक्ष देईल का असा प्रश्न निर्माण झाला आहे.
