मध्य आणि हार्बर मार्गावर रविवारी मेगाब्लॉक

उपनगरीय मार्गावरील रुळांची दुरुस्ती करण्याबरोबरच सिग्नल यंत्रणेतील तांत्रिक कामे करण्यासाठी मध्य आणि हार्बर मार्गावर रविवार, 21 जानेवारी मेगाब्लॉक घेण्यात येणार आहे. मध्य रेल्वेच्या माटुंगा-ठाणे अप आणि डाऊन जलद मार्गावर, तर हार्बर मार्गावरील कुर्ला-वाशी अप आणि डाऊन मार्गावर मेगाब्लॉक घेण्यात येणार असल्यामुळे प्रवाशांची गैरसोय होणार आहे.  मध्य रेल्वे मार्गावर माटुंगा-मुलुंड अप आणि डाऊन जलद मार्गावर सकाळी 11.05 ते दुपारी 3.55 वाजेपर्यंत छत्रपती शिवाजी महाराज टर्मिनस येथून सुटणाऱ्या जलद मार्गावरील लोकल माटुंगा आणि मुलुंड स्थानकांदरम्यान डाऊन धीम्या  मार्गावर वळवण्यात येतील. ठाणे येथून सुटणाऱ्या अप जलद मार्गावरील सेवा मुलुंड आणि माटुंगादरम्यान अप धीम्या मार्गावर वळवण्यात येऊन त्यांच्या संबंधित नियोजित थांब्यांवर थांबतील.  हार्बर मार्गावर कुर्ला-वाशी अप आणि डाऊन मार्गावर सकाळी 11.10 ते  दुपारी 4.10 वाजेपर्यंत ब्लॉक असणार आहे.