मुंबई महानगरपालिकेने प्रभागनिहाय अंतिम आरक्षण आज राजपत्रात जाहीर करण्यात आले आहे. पालिकेने काढलेल्या आरक्षण लॉटरीनुसारच हे आरक्षण असून यात कोणताही बदल झालेला नाही.
अनुसूचित जाती (महिला), अनुसूचित जमाती (महिला), नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) व सर्वसाधारण महिलाच्या आरक्षणासाठी 11 नोव्हेंबर रोजी सोडत काढण्यात आली. त्यानुसार 2025 च्या निवडणुकीसाठीच्या एकूण 227 जागांपैकी अनुसूचित जातीसाठी 15, अनुसूचित जमातींसाठी 2, नागरिकांचा मागासवर्ग प्रवर्गाकरिता 61 जागा राखीव झाल्या, तर एकूण 227 जागांपैकी 114 जागा महिलांसाठी राखीव झाल्या. यापैकी 8 जागा अनुसूचित जाती (महिला), 1 जागा अनुसूचित जमाती, 31 जागा नागरिकांचा मागासवर्ग प्रवर्ग (महिला) तर 74 जागा सर्वसाधारण महिलांसाठी राखीव आहेत.
