कार्तिकी शुद्ध एकादशी 2 नोव्हेंबर 2025 रोजी असून, या यात्रा कालावधीत पंढरपुरात श्री विठ्ठल-रुक्मिणीच्या दर्शनासाठी लाखो भाविक येतात. वारी कालावधीत येणाऱ्या भाविकांच्या सुरक्षेसाठी तसेच वारी निर्विघ्नपणे पार पडण्यासाठी पोलीस यंत्रणा सज्ज असल्याची माहिती उपविभागीय पोलीस अधिकारी प्रशांत डगळे यांनी दिली.
कार्तिकी वारीत पोलीस प्रशासनाने वारकरी तसेच स्थानिक नागरिकांच्या सुरक्षा तसेच अतिक्रमण मोहिमेला प्राधान्य दिले असून, सुरक्षेसाठी व वाहतूक नियत्रंणासाठी 3 हजार 57 पोलीस अधिकारी व कर्मचारी यांची नेमणूक करण्यात आली आहे. यामध्ये एक पोलीस अधीक्षक, एक अपर पोलीस अधीक्षक, 12 पोलीस उपअधीक्षक, 30 पोलीस निरीक्षक, 127 सहायक पोलीस निरीक्षक व पोलीस उपनिरीक्षक, 1 हजार 386 पोलीस अंमलदार व 1 हजार 500 होमगार्ड तसेच 2 एसआरपीएफ कंपनी, 04 बीडीएस पथके, आरसीपी दोन पथके, क्युआरटी दोन पथके, आपत्कालीन परिस्थिती हाताळण्यासाठी प्रशिक्षित 10 कार्ट पथके नियुक्त करण्यात आली आहेत. तसेच जलप्रवासी वाहतुकीवर नियंत्रण राहण्यासाठी 8 ठिकाणी पथके स्थापन केली आहेत.
गर्दीवर नियंत्रण ठेवण्यासाठी तसेच कोणताही अनुचित प्रकार घडू नये, यासाठी नदीपात्र, 65 एकर, महाद्वार, महाद्वार घाट, पत्राशेड यांसह आदी ठिकाणी 12 वॉच टॉवर उभारण्यात आले आहेत. वारकरी भाविकांना संरक्षण देण्यासाठी तसेच चोरी रोखण्यासाठी माउली स्कॉडची स्थापना करण्यात आली असून, यामध्ये वारकरी व नागरिकांच्या वेशात पोलीस अधिकारी तैनात करण्यात आले आहेत. दरम्यान, जिल्हा पोलीस अधीक्षक अतुल कुलकर्णी यांच्या आदेशान्वये जड वाहतूक शहराबाहेरून वळविण्यात आली आहे. तसेच वाहतूक नियमनासाठी शहराबाहेर 12, तर शहरांतर्गत 10 ठिकाणी डायव्हर्शन पॉइंट सुरू करण्यात आले आहेत. त्याचबरोबर खासगी वाहनधारकांच्या वाहनांना थांबण्यासाठी शहरात व शहराबाहेर 16 ठिकाणी वाहनतळ व्यवस्था करण्यात आली आहे.
3 हजार 57 पोलीस अधिकारी व कर्मचारी
7 ठिकाणी तीर्थक्षेत्र पोलीस मदत केंद्रे
16 ठिकाणी वाहनतळ
सुमारे 11 हजार वाहनांची पार्ंकग व्यवस्था
12 वॉच टॉवर; पाच अतिक्रमण पथके
