रस्त्याने चालताना पाय घसरून पडल्याने उघड्या चेंबरमध्ये पडून एका व्यक्तीचा मृत्यू झाल्याची घटना कल्याण शीळ रोडवर घडली. या घटनेमुळे डोंबिवली एमआयडीसीचा भोंगळ कारभार चव्हाट्यावर आला आहे. बाबू धर्मा चव्हाण असे मयत व्यक्तीचे नाव आहे. या घटनेमुळे नागरिकांमध्ये तीव्र संताप व्यक्त होत आहे. उघड्या चेंबर्सबाबत नागरिकांनी वारंवार तक्रार करूनही एमआयडीसी त्याकडे डोळेझाक करत आहे.
कल्याण पूर्वेकडील शीळ रोडवर टाटा नाका गांधीनगर परिसरातून रविवारी चालत असताना बाबू चव्हाण यांचा पाय घसरला. यामुळे ते शेजारी उघड्या असलेल्या चेंबरमध्ये पडले. यात त्यांच्या डोक्याला जबर मार लागला. नागरिकांनी एक व्यक्ती चेंबरमध्ये पडल्याचे पाहताच तात्काळ धाव घेत चव्हाण यांना बाहेर काढले. चव्हाण यांना तात्काळ उपचारासाठी रुग्णालयात दाखल करण्यात आले.
चव्हाण यांच्या डोक्याला गंभीर दुखापत झाल्याने उपचारादरम्यान त्यांचा मृत्यू झाला. या घटनेनंतर संतप्त नगारिकांनी रुग्णालयात गर्दी केली होती. याप्रकरणी एमआयडीसी प्रशासनाविरोधात सदोष मनुष्यवधाचा गुन्हा दाखल करावा अशी मागणी नागरिकांकडून करण्यात येत आहे.
