केंद्र सरकारने जुना आयकर कायदा 1961 ला बदलून आता नवीन आयकर कायदा लागू करण्याचे ठरवले आहे. हा नवीन कायदा येत्या 1 एप्रिल 2026 पासून देशभरात लागू केला जाणार आहे. या कायद्यात सर्वात मोठा बदल म्हणजे ‘असेसमेंट इयर’ आणि ‘प्रीव्हियस इयर’ऐवजी ‘टॅक्स इयर’ वापरला जाणार आहे. या नव्या बदलामुळे सामान्य करदात्याला आयटीआर फाईल दाखल करताना कमी गोंधळाला सामोरे जावे लागेल. उत्पन्न मिळवण्याचे वर्ष आणि कर अहवाल देण्याचे वर्ष एकच असणार आहे.
आतापर्यंत आयकर कायदा 1961 मध्ये उत्पन्न मिळवण्याचे वर्ष आर्थिक वर्ष (एफवाय) म्हणून ओळखले जात होते आणि त्यावर कराचे मूल्यांकन पुढील वर्षात होत असे, ज्याला असेसमेंट इयर (एवाय) म्हटले जात होते. म्हणजेच 2024-25 मध्ये कमावलेले उत्पन्न 2025-25 मध्ये मूल्यांकित केले जात होते. यामुळे सामान्य माणसाला उत्पन्न कोणत्या वर्षाचे आहे आणि मूल्यांकन कोणत्या वर्षाचे आहे हे समजण्यात अडचण येत होती. नवीन कायद्यात ‘टॅक्स इयर’ हे उत्पन्न कमावण्याचे आणि अहवाल देण्याचे एकच वर्ष मानले जाईल. म्हणजेच ज्या वर्षी उत्पन्न कमावले, त्याच वर्षी त्याचा कर भरला जाईल आणि मूल्यांकन केले जाईल.
