>> दुर्गेश आखाडे
चुकलं तुझं बाळ आई,
रडतं धाई धाई गं…
रडतं धाई धाई गं,
ये ना माझे आई गं…
आईपासून ताटातूट झाल्यानंतर बाळाच्या होणाऱ्या अवस्थेचं वर्णन करणारं हे गीत. या गीताची आठवण यावी असा काहीसा प्रसंग रत्नागिरीतील पुनस येथे एका बिबट्याच्या बछड्याच्या बाबतीत घडला आहे. पण आईच्या मायेला पारख्या झालेल्या या बछड्याचे वन विभागाच्या संवेदनशील कर्मचाऱ्यांनी हाल होऊ दिले नाहीत. या बछड्याला आईचे प्रेम दिले. अगदी बाटलीने दूधही पाजले. अनेक प्रयत्न करूनही त्याची आई न सापडल्याने या बछड्याला आता मुंबईतील संजय गांधी राष्ट्रीय उद्यानात पाठवण्यात आले आहे.
लांजातील पुनस येथील तिठय़ाजवळ 8 मे रोजी बिबट्याचे एक पिल्लू सापडले. हे पिल्लू आपल्या आईपासून दुरावल्याचे लक्षात आले. मग त्या मायलेकराची भेट व्हावी म्हणून प्रयत्न सुरू करण्यात आले. त्यासाठी हे पिल्लू ज्या ठिकाणी सापडले, त्याच जंगलमय परिसरात त्याला पुन्हा सोडण्यात आले. मात्र त्याची आई तिकडे फिरकली नाही. त्यानंतर साताऱ्याचे पशुवैद्यकीय वन्यजीव अधिकारी डॉ. निखिल बनगर यांना पाचारण करण्यात आले. त्यांनी त्या पिल्लाची वैद्यकीय तपासणी केली व त्याला पुन्हा एकदा जंगलातील त्याच ठिकाणी सोडण्यास सांगितले. त्या पिल्लावर कॅमेऱ्याची नजर होती. मध्यरात्री एक मादी बिबट बछड्याजवळ येऊन गेल्याचे कॅमेयात कैद दिसले, पण दुसऱ्या दिवशी बछडा तिथेच सापडला. त्याची आई येऊन त्याला घेऊन जाईल अशी अपेक्षा होती. मात्र तसे झाले नाही.
शासकीय विश्रामगृहात झाली देखभाल
लांजा येथील शासकीय विश्रामगृहात ठेवून वनाधिकारी प्रकाश सुतार, वनरक्षक सारीक फकीर, श्रावणी पवार, नमिता कांबळे यांनी बछड्याची देखभाल केली. इतर काही अधिकारी व कर्मचाऱ्यांनीही त्यांना सहकार्य केले. बछडयाला बाटलीच्या मदतीने दूध पाजण्यात आले. दिवसातून चार वेळा त्याला दूध पाजले जात होते. कोल्हापूरहून खास खाद्याची पावडर मागवण्यात आली होती, ती त्याला भरवण्यात आली. बछड्याला कुठलाही संसर्ग होऊ नये म्हणूनही काळजी घेतली जात होती. रात्री त्याच्या झोपण्याची सोय एका टबमध्ये करण्यात आली होती.
ड्रोनच्या मदतीने आईचा शोध
बिबट्याचे पिल्लू आणि त्याच्या आईची भेट व्हावी म्हणून आणखी एक प्रयत्न करण्यात आला. कोल्हापूर वनविभागाच्या थर्मल ड्रोनने पिल्लाच्या आईचा शोध घेतला गेला, पण त्यालाही यश आले नाही. अखेर त्या पिल्लाला शासकीय वाहनातून बोरिवली येथील नॅशनल पार्कमध्ये पाठवण्यात आले. आता तिथेच त्याचे पुढील संगोपन होणार आहे.
