ही शिवसेना जोपर्यंत आहे तोपर्यंत तुम्हाला इकडे आम्ही महाराष्ट्राच्या मातीमध्ये मराठी कधीच संपवू देणार नाही. मराठीला आम्ही धक्का तुम्हाला लावायला देणार नाही, असे शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी राज्यातील सत्ताधारी भाजपला ठणकावले. मुंबईतील वर्सोवा विधानसभा मतदारसंघाचे शिवसेनेचे (उद्धव बाळासाहेब ठाकरे) आमदार हारुन खान यांच्या कार्यालयाचा उद्घाटन सोहळ्यावेळी उद्धव ठाकरे हिंदी सक्तीवरून भाजपला इशारा दिला.
वर्सोवा विधानसभेचे शिवसेनेचे आमदार हारुन खान ह्यांच्या कार्यालयाचा उद्घाटन सोहळा | उद्घाटक – पक्षप्रमुख मा. श्री. उद्धवसाहेब ठाकरे | वर्सोवा, मुंबई – #LIVE https://t.co/Rl0lWippXw
— ShivSena – शिवसेना Uddhav Balasaheb Thackeray (@ShivSenaUBT_) June 28, 2025
मी इथे भाषण करायला आलेलो नाही. मनापासून सांगतोय तुम्हाला सगळ्यांना धन्यवाद द्यायला आलेलो आहे. याचं कारण तुम्ही आमदार निवडून आणला. अजूनही गेल्या विधानसभेच्या निकालावर चर्चा चरवण सुरू आहे. निकाल कसा लागला, का लागला? पण या वर्सोवाने दाखवून दिलं की कोणी कितीही आदळआपट केली तरी शिवसेनेचा भगवा इथे कोणी हरवू शकत नाही. आणि मनापासून याबद्दल तुम्हाला धन्यवाद देतोय. एकदा निर्णय घेतल्यानंतर सगळ्यांनी झटून मेहनत केली. आणि हा वॉर्ड आपण खेचून आणला, असे उद्धव ठाकरे यावेळी म्हणाले.
उद्या एक कार्यक्रम मी तुम्हाला दिलेलाच आहे आणि अतिशय महत्त्वाचा कार्यक्रम आहे. कारण आपण कोणत्याही भाषेचा द्वेष कधीच केलेला नाही. इथेही इतर भाषिक आले असतील. हिंदी भाषिक, गुजराती भाषिक असतील. आणखी इतरही कोणी असतील. आपला भाषेला विरोध नाही पण आपल्यावर जी सक्ती केली जातेय त्या सक्तीला आपण विरोध करतोय. आणि आता या भाजपला असं वाटतंय की मराठी माणसाची एकजूट आता राहिलेली नाही, फुटलेली आहे. आता आपल्याला इकडे कोणी अडवू शकत नाही. त्यांना मला सांगायचं की, तुम्ही जे काय मांडीवर घेऊन बसलायेत ती शिवसेना नाहीये, खरी शिवसेना इकडे आहे. आणि ही शिवसेना जोपर्यंत आहे तोपर्यंत तुम्हाला इकडे आम्ही महाराष्ट्राच्या मातीमध्ये मराठी कधीच संपवू देणार नाही. मराठीला आम्ही धक्का तुम्हाला लावायला देणार नाही, असे उद्धव ठाकरे यांनी सत्ताधारी भाजपला ठणकावले. उद्याचं आंदोलन आहे. त्यानंतर ५ तारखेला मोर्चा सुद्धा आहे. तुमची ही एकजूट अशीच कायम ठेवा.
