अनित्रित भरधाव कार कालव्यात कोसळल्याची घटना मंगळवारी गुजरातमध्ये घडली. आतापर्यंत दोघांचे मृतदेह पाण्यातून बाहेर काढण्यात आले आहेत. अन्य तिघांचा शोध सुरू आहे. घटनेची माहिती मिळताच अग्नीशमन दलाने तात्काळ घटनास्थळी धाव घेत बचावकार्य सुरू केले. अपघाताचे नेमके कारण अद्याप कळू शकले नाही.
गांधीनगरमधील नाभोई कालव्यात मंगळवारी दुपारी किआ सेल्टोस कार कोसळली. प्रत्यक्षदर्शींनी दिलेल्या माहितीनुसार कार अचानक पलटी झाली आणि कालव्यात पडली. कारमध्ये पाच जण होते. कालव्यात पाण्याचा प्रवाह अधिक असल्याने बचावकार्यात अडचणी येत आहेत. बचाव पथक आणि अग्नीशमन दलाने आतापर्यंत दोघांचे मृतदेह बाहेर काढले आहेत. बचाव उपकरणांचा वापर करून कार कालव्यातून बाहेर काढण्यात आली. उर्वरित प्रवाशांचा शोध घेण्याचे प्रयत्न अजूनही सुरू आहेत.
