मुंबई विद्यापीठाशी संलग्नित महाविद्यालये, स्वायत्त महाविद्यालये आणि मान्यताप्राप्त शिक्षण संस्थांमध्ये शैक्षणिक वर्ष 2024-2025साठी पदवीच्या 3 आणि 4 वर्षीय अभ्यासक्रमांच्या प्रथम वर्षासाठीच्या प्रवेशपूर्व ऑनलाईन नावनोंदणीस मुदतवाढ देण्यात आली आहे. मंगळवार, 11 जून रोजी संध्याकाळी 5 वाजेपर्यंत ही मुदतवाढ असून या कालावधीत विद्यार्थ्यांना प्रवेशपूर्व नोंदणी ते संबंधित महाविद्यालयात अर्ज सादर करणे अनिवार्य आहे.
प्रवेशपूर्व ऑनलाईन नाव नोंदणीसाठी http://muugadmission.samarth.edu.in या संकेतस्थळावर जाऊन विद्यार्थ्यांना नोंदणी करता येणार आहे. तसेच विद्यार्थ्यांना ज्या महाविद्यालयात प्रवेश घ्यावयाचा आहे त्या महाविद्यालयाचे ऑनलाईन किंवा ऑफलाईन अर्ज भरणेदेखील अनिवार्य आहे.
प्रवेशपूर्व ऑनलाईन नावनोंदणी 25 मे ते 10 जून या कालावधीत घेण्यात आली. मात्र या कालावधीत एखाद्या विद्यार्थ्यास काही अपरिहार्य कारणास्तव नोंदणी अर्ज सादर करण्यास उशीर झाला असल्यास त्यांना संधी मिळावी या उद्देशाने ही मुदतवाढ दिली जात असल्याचे परीक्षा व मूल्यमापन मंडळाच्या संचालिका डॉ. पूजा रौंदळे यांनी सांगितले. तसेच विद्यापीठाच्या प्रचलित नियमानुसार व वेळापत्रकानुसार गुणवत्ता यादी ही त्या-त्या महाविद्यालयामार्फत जाहीर केली जाणार असल्याचेही त्यांनी सांगितले.
