बॉलीवूडची सुप्रसिद्ध अभिनेत्री दिशा पटानीच्या उत्तर प्रदेशातील बरेली येथील घरावर गोळबार केल्याची धक्कादायक घटना घडली आहे. शुक्रवारी (12 सप्टेंबर 2025) साडेचारच्या सुमारास दुचाकीवरून आलेल्या दोघांनी दिशा पटानीच्या घरावर फायरींग केली. सुदैवाने या घटनेत कोणतीही जीवितहानी झालेली नाही. घटनेची माहिती मिळताच पोलीस घटनास्थळी दाखल झाले आहेत. या हल्ल्याची जबाबदारी गँगस्टर रोहित गोदरा आणि गोल्डी ब्रार गँगने घेतली आहे.
बरेली येथील सिव्हिल लाईन परिसरात दिशा पटानीचे वडील निवृत्त डिप्टी एसपी जगदीश पटानी राहतात. याच घरावर दुपारी गोळीबार झाल्याची घटना घडली आहे. या घटनेमुळे परिसरात भीतीचे वातावरण निर्माण झाले असून बॉलीवूड हादरून गेलं आहे. दरम्यान गँगस्टर रोहित गोदारा आणि गोल्डी ब्रार गँगने सोशल मीडियावर पोस्ट करत हल्ल्याची जबाबदारी घेतली आहे.
