चीनमधील विविध भागांत सध्या पर्यावरण, जमिनीचे वाद आणि प्रशासकीय समस्यांविरुद्ध जनतेचा मोठा असंतोष पाहायला मिळत आहे. ‘द इपॉक टाइम्स’च्या (TET) अहवालाचा हवाला देत एएनआयने (ANI) प्रसिद्ध केलेल्या वृत्तानुसार, चीनच्या अनेक प्रांतांत नागरिक आणि पोलीस यांच्यात हिंसक चकमकी झाल्या असून परिस्थिती नियंत्रणात ठेवण्यासाठी प्रशासनाने सुरक्षा व्यवस्था प्रचंड कडक केली आहे.
वुहानमध्ये बॅटरी प्रकल्पाला विरोध
मध्य चीनमधील वुहान शहरात एका बॅटरी उत्पादन प्रकल्पावरून तणाव निर्माण झाला आहे. पर्यावरण बिघडण्याच्या भीतीने स्थानिक नागरिक फेब्रुवारीपासून या प्रकल्पाला विरोध करत आहेत. ८ मार्च रोजी हजारो घरांच्या मालकांनी केलेल्या निदर्शनांना पोलिसांनी बळाचा वापर करून पांगवले, ज्यामध्ये अनेकांना ताब्यात घेण्यात आले. २८ मार्चच्या रात्री पुन्हा शेकडो नागरिक रस्त्यावर उतरले होते, मात्र पोलिसांनी रात्री उशिरा कारवाई करत ही गर्दी पांगवली.
ग्वांगडोंग प्रांतात स्मशानभूमीवरून वाद
दक्षिण ग्वांगडोंग प्रांतातील शुइकोऊ (Shuikou) येथे रहिवासी भाग आणि शाळेजवळ स्मशानभूमी बांधण्याच्या योजनेला विरोध होत आहे. २५ मार्च रोजी झालेल्या निदर्शनात सुमारे ३,००० लोक सहभागी झाले होते. येथे आंदोलक आणि दंगल नियंत्रण पथक यांच्यात जोरदार संघर्ष झाला असून, अनेक लोक जखमी झाले आहेत. प्रशासनाने या भागात लोकांच्या हालचालींवर निर्बंध घातले असून ओळखपत्रांची तपासणी सुरू केली आहे.
बीजिंगमध्ये हाय अलर्ट आणि ड्रोनवर बंदी
राजकीय स्थिरता आणि सर्वोच्च नेतृत्वाच्या सुरक्षेसाठी राजधानी बीजिंगमध्ये मोठ्या प्रमाणावर पोलीस तैनात करण्यात आले आहेत. विशेषतः चांगआन एव्हेन्यू या संवेदनशील मार्गावर पोलिसांचा कडा पहारा आहे.
