इस्रायल आणि इराणध्ये युद्धाचे ढग दाटू लागले आहेत. इस्रायलने शुक्रवारी पहाटे इराणवर हल्ला केला आणि याचा थेट परिणाम शेअर बाजारावर झाला. जगभरासह हिंदुस्थानच्या शेअर बाजारावरही याचा परिणाम दिसला आणि आठवड्याच्या कामकाजाच्या अखेरच्या दिवशी बाजारात मोठी घसरण पाहायला मिळाली. मुंबई शेअर बाजाराचा निर्देशांक सेन्सेक्स आणि राष्ट्रीय शेअर बाजाराचा निर्देशांक निफ्टीमध्ये मोठी घसरण झाली.
शुक्रवारी बाजार उघडताच सेन्सेक्स 1300, तर निफ्टी 400 अकांनी कोसळला. सेन्सेक्समध्ये 1.6 टक्क्यांच्या घसरणीसह 80,354 वर पोहोचला, तर निफ्टी 1.7 टक्के घसरणीसह 24,473 वर पोहोचला. बीएसई मिडकॅप आणि स्मॉलकॅप निर्देशांकही 1.5 टक्के घसरला. यामुळे बीएससीमध्ये सूचीबद्ध कंपन्यांचे एकूण बाजार भांडवल 449.6 लाख कोटींवरून 442.5 कोटींवर आले.
शुक्रवारच्या घसरणीमुळे अवघ्या काही मिनिटांमध्ये गुंतवणूकादारांच्या 7 लाख कोटींचा धूर झाला. तसेच दिवसभर बाजारावर ‘ब्लॅक फ्रायडे’ इम्पॅक्ट राहण्याची शक्यता आहे. गुरूवारीही एअर इंडियाचे विमान कोसळल्यानंतर बाजारातही नकारात्मक वातावरण निर्माण झाले आणि पडझड सुरू झाली.
Sensex tanks 1,337.39 points to 80,354.59 in early trade; Nifty drops 415.2 points to 24,473
— Press Trust of India (@PTI_News) June 13, 2025
घसरणीमागची प्रमुख कारणे
– इस्रायलने इराणच्या सैन्य ठिकाणांवर आणि अणुप्रकल्पांवर हल्ला केला आहे. गरज आहे तोपर्यंत ही कारवाई सुरू राहील असे इस्रायलचे पंतप्रधान नेतन्याहू म्हणाले. त्यामुळे जागतिक बाजारात अनिश्चिततेचे वातावरण निर्माण झाले.
– इराणवरील हल्ल्यानंतर कच्च्या तेलाच्या किंमती 10 टक्क्यांहून अधिक वाढल्या आहेत. तेलाच्या किंमतीत वाढ झाल्याने अनेक देशांचे आर्थिक गणित कोलमडणार आहे.
– आंतरराष्ट्रीय स्तरावर अनिश्चिततेचे वातावरण असल्याने गुंतवणूकदार बॉण्डस, डॉलर आणि सोन्यासारख्या सुरक्षित गुंतवणुकीकडे वळत आहेत.
– डॉलरच्या तुलनेमध्ये रुपयाची घसरण झाली आहे. एक डॉलरच्या तुलनेत रुपया 54 पैशांनी घसरून 86.14 वर पोहोचला आहे.
– इस्रायल-इराण युद्ध हे घसरणीचे कारण असले तरी अमेरिकेचे राष्ट्राध्यक्ष डोनाल्ड ट्रम्प यांनी आणलेली टॅरिफ धोरणे आणि त्याचे भविष्यातील परिणाम याचाही बाजारावर परिणाम होत आहे.
