पनवेल महापालिका अंतर्गत येणाऱ्या खारघर शहराला स्मार्ट सिटीचा दर्जा मिळाला असला तरीही मुख्य रस्त्यावर जागोजागी खड्डे पडले आहेत. अवघ्या १५ दिवसांपूर्वी डांबरीकरण केलेले रस्ते उखडले आहेत. त्यामुळे नागरिकांमध्ये संताप आहे. ठेकेदार, भ्रष्ट अधिकाऱ्यांनी स्मार्ट खारघर खड्ड्यात घातल्याचा आरोप करत आज शिवसेना (उद्धव बाळासाहेब ठाकरे) पक्षाने जोरदार आंदोलन केले. शिवसैनिकांनी खड्ड्यात वृक्षारोपण करून प्रशासनाचा निषेध केला.
खारघर शहरात १५ दिवसांपूर्वी डांबरीकरण केलेल्या रस्त्यावरही भलेमोठे खड्डे पडले आहेत. त्यामुळे अधिकारी आणि कंत्राटदारांचा भ्रष्टाचार उघडा पडला आहे. महापालिका कोट्यवधींचा निधी रस्ते बांधण्यासाठी देते की खड्डे पाडण्यासाठी, असा सवाल करत जिल्हाप्रमुख शिरीष घरत यांच्या नेतृत्वाखाली खारघर, पनवेलमधील शिवसैनिकांनी आंदोलन केले. खड्ड्यामध्ये झाडे लावत निकृष्ट कामाचा निषेध केला. आंदोलनात महानगरप्रमुख अवचित राऊत, समन्वयक दीपक घरत, उपमहानगरप्रमुख रामदास गोंधळी, खारघर शहरप्रमुख गुरू म्हात्रे, शहरप्रमुख यतीन देशमुख, सदानंद शिर्के, प्रवीण जाधव, विभाग संघटक रामचंद्र देवरे, युवासेना शहर अधिकारी निखिल पानमंद, अभिजीत ओझा, अश्विन ससाणे, रोहित बालगुडे, संतोष टाकावले, सिद्धेश गुरव, निखिल पाटील, शाखाप्रमुख संतोष शिंदे, महिला आघाडी उपजिल्हा संघटक रेवती सकपाळ, शहर संघटक संगीता राऊत, नंदा चेडे आदी सहभागी झाले होते.
