पुनर्बांधणीच्या कामामुळे गेल्या दीड वर्षापासून बंद असलेला दादर येथील ऐतिहासिक शिवाजी पार्क जिमखाना पुन्हा सर्वांच्या भेटीला येणार आहे. जिमखान्याला हेरिटेज लूक देण्यात आला असून घटस्थापनेच्या मुहूर्तावर म्हणजेच येत्या सोमवारी सकाळी 10 वाजता नव्या वास्तूचे दिमाखात लोकार्पण होणार आहे.
1909 साली हा जिमखाना सुरू झाला त्यावेळेस त्याचे नाव ‘दादर हिंदू जिमखाना’ असे होते. पुढे ‘माहीम पार्क’चे नाव शिवाजी पार्क झाल्यानंतर या जिमखान्याचे नाव ‘शिवाजी पार्क जिमखाना’ झाले. स्वातंत्र्यपूर्व काळात जेव्हा जिमखाने ही फक्त ब्रिटिशांची मक्तेदारी होती आणि मुंबईतले इतर जिमखाने हे आंग्लाळलेल्या संस्कृतीची प्रतीके होती तेव्हा दिमाखाने ‘दादर हिंदू जिमखाना’ आणि पुढे ‘शिवाजी पार्क जिमखाना’ नाव मिरवणारा हा जिमखाना. या जिमखान्याच्या वास्तूने स्वातंत्र्य पूर्वकाळ, स्वातंत्र्य चळवळ, संयुक्त महाराष्ट्र चळवळ ते अनेक राजकीय पक्षांचा प्रसव काळ पाहिला. अनेक खेळाडू घडताना पाहिले. विजय मांजरेकर, सुभाष गुप्ते, अजित वाडेकर, संदीप पाटील तसेच अनेक खेळाडूंना जवळून पहिले. दादर-माहीम परिसर हा सांस्कृतिकदृष्टय़ा संपन्न राहिला तो या भागातील अनेक थोर साहित्यिकांच्या आणि कलाकारांच्या वास्तव्यामुळे. आणि या भागातील लोकांमध्ये एक खिलाडू वृत्ती रुजली ती शिवाजी पार्कमधील खेळाडूंमुळे.
चेहरामोहरा बदलला तरी आत्मा तोच
शतकोत्तर रौप्य महोत्सवी वर्षाच्या उंबरठय़ावर असलेल्या या जिमखान्याची पुनर्बांधणी करताना नवीन पिढीच्या अपेक्षेला साजेसे जिमखान्याचे रुपडे आणि सुखसोयी असाव्यात यावर भर देण्यात आला आहे. डिजिटल प्रवेश प्रणाली, अत्याधुनिक जिम, स्मार्ट सेफ्टी मॉनिटरिंग, नवे स्पोर्ट्स इन्फ्रास्ट्रक्चर आणि आकर्षण इंटीरिअर करण्यात आले आहे. जिमखान्याचा चेहरामोहरा बदलला तरी आत्मा तोच आहे, असे जिमखान्याचे अध्यक्ष प्रवीण आमरे यांनी सांगितले.
- शिवाजी पार्क जिमखान्याला हेरिटेज लूक देण्यात आला असून त्यानुसार पुनर्बांधणी करताना आम्हाला काही बदल करावे लागले. खालच्या बाजूला असलेले तीन डिपार्टमेंट आम्ही वरच्या बाजूला शिफ्ट केले. रेस्टॉरंटची जागा आता आणखी मोठी झाली आहे. याशिवाय हेरिटेज लूकला साजेसे असे एक भलेमोठे घडय़ाळ आम्ही लावले आहे, अशी माहिती शिवाजी पार्क जिमखान्याचे असिस्टंट जनरल सेक्रेटरी सुनील रामचंद्रन यांनी दिली.
