सरकारी कर्मचाऱ्याने निवडणुकीत सक्रिय सहभाग घेऊ नये. कोणत्याही विधानसभा व स्थानिक निवडणुकांत ते प्रचार करू शकणार नाहीत. निवडणुकीत हस्तक्षेप करू शकणार नाहीत किंवा आपले वजन वापरू शकणार नाहीत, असा स्पष्ट नियम असतानाही मुख्यमंत्र्यांचे खासगी सचिव विद्याधर महाले हे सर्व शासकीय नियम धाब्यावर बसवून चिखली नगर परिषद निवडणुकीत भाजप उमेदवाराच्या प्रचारात दंग असल्याचा आरोप कॉँग्रेस जिल्हाध्यक्ष माजी आमदार राहुल बोंद्रे यांनी केला आहे. दरम्यान, या प्रकरणी राज्य निवडणूक आयोगाने जिल्हाधिकाऱ्यांना तत्काळ चौकश्या करून अहवाल सादर करण्याचे आदेश दिले आहेत.
विद्याधर दयासागर महाले हे मुख्यमंत्री देवेंद्र फडणवीस यांचे खासगी सचिव असून ते चिखली विधानसभा आमदार श्वेता महाले यांचे पती आहेत. विद्याधर महाले हे शासकीय कर्मचारी असून अनेक वर्षांपासून प्रतिनियुक्तीवर मंत्रालयात कार्यरत आहे. त्यांना महाराष्ट्र कर्मचारी सेवा नियम (वर्तवणूक) 1979 लागू आहे. असे असतानाही विद्याधर महाले हे स्थानिक स्वराज्य संस्थांच्या निवडणुकीत चिखली मतदारसंघात खुलेआम भाजप उमेदवारांचा प्रचार करत आहेत. यासंदर्भात माजी आमदार राहुल बोंद्रे, चिखली नगर परिषदेतील कॉँग्रेसचे नगराध्यक्षपदाचे उमेदवार काशीनाथ बोंद्रे, माजी सरपंच मनोज लाहुडकर यांनी राज्य निवडणूक आयोग तसेच संबंधित जिल्हा व नगर परिषदेच्या निवडणूक अधिकाऱ्यांकडे तक्रार दाखल करत कारवाईची मागणी केली आहे.
भाजपच्या कार्यक्रमात खुलेआम वावर
विधानसभेच्या सार्वत्रिक निवडणुकीत विद्याधर महाले यांनी पत्नीसाठी चिखली मतदारसंघात प्रचार केला होता. नगर परिषदत निवडणुकीतही ते भाजप कार्यक्रमात खुलेआम सहभागी होऊन प्रचार करत आहेत. त्यांनी भाषण करून उमेदवारास निवडून आणण्याचे केलेले आवाहन याचे व्हिडीओ समाजमाध्यमांवर सतत प्रसारित केले जात आहेत. महाले यांच्याकडून सरकारी सेवा नियमांचे तसेच निवडणूक आचारसंहितेचा भंग होत आहे. त्यांना निवडणुकीचा निकाल लागेपर्यंत मुंबई मुख्यालयी ठेवण्याचे आदेश पारीत करावेत, अशी मागणी राहुल बोंद्रे यांनी निवडणूक आयोगाकडे केली आहे.
