आष्टा पोलीस ठाणे हद्दीतील सराईत सूरज घस्ते टोळीला सांगली आणि कोल्हापूर या दोन जिह्यांतून हद्दपार करण्यात आले. या टोळीतील सहाजणांवर दोन वर्षांसाठी ही कारवाई करण्यात आली.
टोळीचा म्होरक्या सूरज नंदकुमार घस्ते (वय 21), आदित्य प्रकाश घस्ते (वय 23), ओंकार प्रकाश घस्ते (वय 27), स्वरूप दत्तात्रय अष्टेकर (वय 22), अभिषेक दत्तात्रय अष्टेकर (वय 24), गणेश संजय लोखंडे (वय 24, सर्व रा. डांगे कॉलेजजवळ, आष्टा, ता. वाळवा) अशी हद्दपार केलेल्या संशयितांची नावे आहेत. निवडणुकीच्या पार्श्वभूमीवर पोलीस अधीक्षक संदीप घुगे यांनी ही कारवाईचा बडगा उगारला.
या टोळीविरुद्ध 2018 ते 2025 या कालावधीत संगनमत करून दगडफेक करून नुकसान करणे व सार्वजनिक मालमत्तेचे नुकसान करणे, बेदरकारपणे दुचाकी चालवून गंभीर जखमी करणे, शिवीगाळ करणे, बेकायदेशीर जमाव जमवून खंडणी मागणी, दुखापत, गर्दी, मारामारी, दुचाकी चोरी, जीवे ठार मारण्याची धमकी देणे, असे शरीराविरुद्धचे व मालमत्तेविरुद्धचे गंभीर स्वरूपाचे गुन्हे दाखल आहेत.
संशयित सराईत गुन्हेगार असून, ते कायद्याला न जुमानणारे आहेत. त्यांची दहशत मोडीत काढण्यासाठी या टोळीविरुद्ध आष्टय़ाचे सहायक पोलीस निरीक्षक सत्यजित आवटे यांनी महाराष्ट्र पोलीस कायदा कलम 55 अन्वये प्रस्ताव सादर केला होता. पोलीस अधीक्षकांनी याचे अवलोकन करून या टोळीवर हद्दपारीची कारवाई केली.
आगामी स्थानिक स्वराज्य संस्थांच्या निवडणुकीच्या काळात टोळीने गुन्हे करणऱया टोळ्यांवर बारकाईने नजर ठेवून त्या नेस्तनाबूत करण्यासाठी यापुढेही कडक कारवाई करण्यात येणार आहे. कारवाईत अपर अधीक्षक कल्पना बारवकर, एलसीबीचे निरीक्षक सतीश शिंदे, सहायक निरीक्षक जयदीप कळेकर, संदीप पाटील, बसवराज शिरगुप्पी, दीपक गट्टे, प्रशांत यादव, राजेंद्र जाधव, तुळशीराम घिगे यांचा कारवाईत सहभाग होता.
