शेरी नाल्याचा प्रश्न कायमचा सोडविण्याबरोबर सांगली नगरीत अद्ययावत भाजी मंडई, रस्ते, गटारींचे प्रश्न सोडवू, अशा अनेक घोषणांची बरसात करून उपमुख्यमंत्री अजित पवार यांनी मुख्यमंत्र्यांच्या पावलावर पाऊल टाकत सांगलीकर जनतेला आशेचे गाजर दाखवले.
सांगली-मिरज-कुपवाड शहर महानगरपालिका निवडणुकीच्या निमित्ताने आज मिरज शहरात उपमुख्यमंत्री अजित पवार यांची जाहीर सभा झाली. राज्यात सत्तेत एकत्र असणारे महायुतीतील घटक पक्ष असणारा राष्ट्रवादी (अजित पवार गट) सांगली महापालिका निवडणुकीत स्वतंत्रपणे लढत आहे. मिरजेतील किसान चौकात झालेल्या सभेत अजित पवार गटाचे उमेदवार, तसेच आमदार इद्रिस नाईकवाडी, माजी खासदार संजयकाका पाटील, प्रा. पद्माकर जगदाळे यांच्यासह राष्ट्रवादीचे पदाधिकारी उपस्थित होते.
चार दिवसांपूर्वी भाजपचा निवडणूक प्रचाराचा शुभारंभ मुख्यमंत्री देवेंद्र फडणवीस यांच्या उपस्थितीत सांगलीत झाला. या सभेत मुख्यमंत्र्यांनी दिलेली आश्वासने जनता विसरत नाही, तोपर्यंत उपमुख्यमंत्री पवार यांनी आज मुख्यमंत्र्यांपेक्षा अधिक आश्वासनाची बरसात केली.
हद्दपार उमेदवार काजी समर्थकांचा गोंधळ
सांगली महापालिका निवडणुकीतील अजित पवार गटाचे उमेदवार अजीम काजी यांना कालच जिह्यातून हद्दपार करण्यात आले आहे. आज अजित पवार यांचे भाषण सुरू असतानाच काजी यांच्या कार्यकर्त्यांनी सभास्थळी घोषणा देऊन गोंधळ घालण्याचा प्रयत्न केला. यावेळी प्रचंड गोंधळ झाल्यामुळे अजित पवार यांनी कार्यकर्त्यांना थांबवत आपले भाषण आवरते घेतले.
