पश्चिम रेल्वे मार्गावरील विविध स्थानकांमध्ये प्रवाशांच्या सोयीसाठी अतिरिक्त 11 सरकते जिने उभारण्यात येणार आहेत. शिवसेना नेते-खासदार अरविंद सावंत यांनी यासंदर्भात आग्रही मागणी करून सातत्याने पाठपुरावा केला होता. त्यांची मागणी मान्य करीत पश्चिम रेल्वे प्रशासनाने मरिन लाईन्स, ग्रॅण्ट रोड, मुंबई सेंट्रल, लोअर परेल, प्रभादेवी अशा विविध स्थानकांत अतिरिक्त सरकते जिने उभारण्यास तयारी दर्शवली आहे. शिवसेनेच्या पाठपुराव्याला हे मोठे यश मिळाले आहे. त्यामुळे रेल्वे स्थानकांतील गैरसोय दूर होऊन लाखो रेल्वे प्रवाशांना दिलासा मिळणार आहे.
रेल्वे स्थानकांवर विशेषतः वृद्ध नागरिक, महिला, दिव्यांगांच्या सोयीसाठी अनेक रेल्वे स्थानकांमध्ये सरकत्या जिन्यांची (एस्केलेटर्स) उपलब्धता नाही. त्यामुळे प्रवाशांची प्रचंड गैरसोय होते. या अनुषंगाने अरविंद सावंत यांनी अतिरिक्त सरकते जिने उभारणीसाठी पश्चिम रेल्वे प्रशासनाकडे सातत्याने पाठपुरावा केला. त्यांच्या मागणीला अनुसरून रेल्वे प्रशासनाने मरिन लाईन्स येथे दोन, ग्रॅण्ट रोड स्थानकात तीन, मुंबई सेंट्रल (लोकल) स्थानकात एक, लोअर परळ येथे तीन आणि प्रभादेवी स्थानकात दोन सरकते जिने अशा प्रकारे अतिरिक्त 11 सरकत्या जिन्यांची व्यवस्था करण्यात येणार आहे.
अरविंद सावंत यांचा पाठपुरावा
पश्चिम रेल्वेचे महाव्यवस्थापक विवेक कुमार गुप्ता यांनी अरविंद सावंत यांना लेखी उत्तराद्वारे सरकत्या जिन्यांबाबत घेतलेला निर्णय कळवला आहे. अरविंद सावंत यांच्या पाठपुराव्यामुळे विविध रेल्वे स्थानकांत अतिरिक्त सरकत्या जिन्यांची उभारणी केली जाणार असल्याने पश्चिम रेल्वे मार्गावरील लाखो प्रवाशांची गैरसोय दूर होणार आहे.
