राष्ट्रवादी काँग्रेसच्या अजित पवार गटाला मोठा हादरा बसला आहे. नागालँडमधील सर्वच्या सर्व 7 आमदारांनी अजित पवार गटाला रामराम केला असून सत्ताधारी नॅशनल डोमोक्रॅटीक प्रोगेसिव्ह पार्टीत अर्थात डीपीपीमध्ये प्रवेश केला आहे. सात आमदारांनी पक्षप्रवेश केल्याने मुख्यमंत्री नेफ्यू रिओ यांच्या नेतृत्वाखाली एनडीपीपी पक्षाला विधानसभेमध्ये पूर्ण बहुमत मिळाले आहे. अजित पवार गटाच्या विलिनिकरणामुळे एनडीपीपीचे 60 सदस्यांच्या विधानसभेतील संख्याबळ 32 वर पोहोचले आहे.
All seven NCP MLAs in Nagaland join CM Neiphiu Rio-led NDPP
— Press Trust of India (@PTI_News) May 31, 2025
राष्ट्रवादी काँग्रेसमध्ये फूट पडल्यानंतर अजित पवार यांनी सत्तेची कास धरत वेगळा मार्ग निवडला आणि महायुती सरकारमध्ये सहभागी होत उपमुख्यमंत्रीपद मिळवले. फूटीमुळे राष्ट्रवादीचे अजित पवार आणि शरद पवार असे दोन गट झाले होते. त्यावेळी नागालँडमधील आमदारांनी अजित पवार गटासोबत राहण्याचा निर्णय घेतला होता.
2023 मध्ये झालेल्या विधानसभा निवडणुकीत एनडीपीपीनंतर अजित पवार गट आणि मित्रपक्ष भारतीय जनता पक्षाने नागालँडमध्ये 12 जागा जिंकल्या होत्या. या निवडणुकीमध्ये अजित पवार गट हा राज्यातील तिसरा मोठा पक्ष म्हणून उदयास आला होता.
अजित पवार गट हा नागालँडमधील सर्वात मोठा विरोधी पक्षही होता. मात्र आता सर्व 7 आमदार फुटल्याने अजित पवार गटाला मोठा धक्का बसला आहे. विशेष म्हणजे या सर्व आमदारांनी एनडीपीपीमध्ये प्रवेश करण्याचा निर्णय विधानसभा अध्यक्षांकडे लेखी स्वरुपात सादर केला असून घटनेच्या दहाव्या स्केड्यूलनुसार हे विलिनिकरण झाल्याचा दावा आमदारांनी केला आहे. तसेच हे विलिनीकरण घटनेच्या दहाव्या स्केड्यूलनुसार वैध आहे आणि 2019 च्या ‘आमदार अपात्रता नियमां’नुसार ते मंजूर करण्यात आले आहे, अशी माहिती विधानसभा अध्यक्षांनी दिली.
कोण आहेत फुटलेले आमदार?
दरम्यान, अजित पवार गटातून फुटलेल्यांमध्ये तेनिंग विधानसभा मतदारसंघाचे आमदार नामरी एन्चांग, अटोइझू विधानसभा मतदारसंघाचे आमदार पिक्टो शोहे, वोखा टाउन विधानसभा मतदारसंघाचे आमदार वाय. मोहोनबेमो हॅम्त्सो, मोन टाउन विधानसभा मतदारसंघाचे आमदार वाय. मानखाओ कोन्याक, लॉंगलेंग विधानसभा मतदारसंघाचे आमदार ए. पोंगशी फोम, नोकलाक विधानसभा मतदारसंघाचे आमदार पी. लाँगोन, आणि सुरुहोतो विधानसभा मतदारसंघाचे आमदार एस. तोइहो येप्थो यांचा समावेश आहे.
