फ्रेंच ओपन ग्रॅण्डस्लॅम टेनिस स्पर्धेतील गुरुवारचा दिवस मॅरेथॉन लढतींनी गाजला. फ्रान्सचा अर्थर फिल्स, कझाकिस्तानचा अलेक्झांडर बबलिक व पोर्तुगालचा हेन्रीक रोचा यांनी पाच सेटपर्यंत रंगलेल्या लढतीत बाजी मारत तिसऱ्या फेरीत धडक दिली.
चौदाव्या मानांकित अर्थर फिल्सने दुसऱया फेरीत स्पेनच्या जौम मुनार याचा मॅरेथॉन लढतीत 7-6(7/3), 7-6(7/4), 2-6, 0-6, 6-4 असा पराभव केला. टायब्रेकपर्यंत ताणलेल्या पहिल्या दोन सेटमध्ये अर्थरने बाजी मारली. त्यानंतर मुनारने पुढील दोन सेट सहज जिंकून लढतीत जोरदार पुनरागमन केले. मात्र चुरशीच्या पाचव्या व निर्णायक सेटमध्ये अर्थरने बाजी मारत विजयावर शिक्कामोर्तब केले. ही लढत तब्बल 4 तास 25 मिनिटांपर्यंत रंगली.
दुसरीकडे कझाकिस्तानच्या अलेक्झांडर बुबलिकने पाच सेटच्या कडव्या लढतीत नवव्या मानांकित ऑस्ट्रेलियन एलैक्स डि मिनॉरचा 2 तास 52 मिनिटांमध्ये 2-6, 2-6, 6-4, 6-3, 6-2 असा पराभव केला. बुबलिकने पहिले दोन सेट गमाविल्यानंतर जोरदार पुनरागमन करत पुढील तीनही सेट जिंकून विजयावर शिक्कामोर्तब केले.
आणखी एका पाच सेटपर्यंत रंगलेल्या लढतीत पोर्तुगालच्या हेन्रीक रोचाने 19 व्या मानांकित झेक प्रजासत्ताकच्या जॅकुब मेन्सिकचा 2-6, 1-6, 6-4, 6-3, 6-3 असे पराभूत करीत तिसरी फेरी गाठली.
