हमासचा गाझा युनिटचा प्रमुख मोहम्मद सिनवार याला इज्रायली सैन्याने ठार केले आहे, असा दावा इज्रायलचे पंतप्रधान बेंजामिन नेतन्याहू यांनी केला. मोहम्मद सिनवार हा हमासचा माजी नेता याह्या सिनवार याचा धाकटा भाऊ होता, जो ऑक्टोबर 2024 मध्ये इज्रायली सैन्याच्या हल्ल्यात ठार झाला होता. गेल्या वर्षी याह्या सिनवारच्या मृत्यूनंतर मोहम्मद सिनवारला हमासच्या गाझा युनिटचा प्रमुख बनवण्यात आलं होतं.
इज्रायली सैन्याने 13 मे रोजी गाझामधील खान युनिस येथील युरोपियन रुग्णालयाखालील हमासच्या भूमिगत कमांड सेंटरवर जोरदार हवाई हल्ला केला होता. या हल्ल्यात मोहम्मद सिनवार आणि हमासच्या राफाह ब्रिगेडचा कमांडर मोहम्मद शबाना यांच्यासह अनेक दहशतवादी ठार झाल्याची माहिती, बेंजामिन नेतन्याहू यांनी जाहीर केली आहे. याआधी मे महिन्याच्या मध्यात इज्रायलचे संरक्षणमंत्री इस्रायल काटझ यांनी मोहम्मद सिनवारच्या मृत्यूची शक्यता व्यक्त केली होती, परंतु नेतन्याहू यांनी आता याला अधिकृत दुजोरा दिला आहे.
