प्रेमाच्या त्रिकोणातून अल्पवयीन जीवलग मित्रानेच मित्राचा दगडाच्या खाणीत ढकलून खून केल्याची धक्कादायक घटना समोर आली आहे. सुरुवातीस अपघात झाल्याचे वाटत असतानाच, संशयातून पोलिसांनी केलेल्या तपासात एका मुलीवरील प्रेमातूनच खुनाचा हा प्रकार समोर आला.
महेंद्र प्रशांत कुंभार (वय – 18, रा. केर्ले, ता. करवीर) असे खून झालेल्याचे नाव आहे. या घटनेची करवीर पोलीस ठाण्यात नोंद झाली असून, खुनाची कबुली दिलेल्या संशयित अल्पवयीन मित्राची न्यायालयाच्या आदेशानुसार बालसुधारगृहात रवानगी करण्यात आली आहे.
याबाबत पोलिसांनी दिलेली माहिती अशी की, करवीर तालुक्यातील पोर्ले तर्फे ठाणे येथील केर्ले गावात महेंद्र आणि अल्पवयीन संशयित आरोपी हे दोघे लहानपणापासूनचे जीवलग मित्र होते. महेंद्रचे गावातीलच एका मुलीसोबत प्रेमसंबंध होते. त्याच मुलीवर संशयित आरोपीचेही एकतर्फी प्रेम होते. महेंद्र आणि ती मुलगी एकमेकांशी बोलतात, भेटतात आणि फिरत असल्याचा राग संशयित आरोपीच्या मनात होता. यावरूनच दोन्ही मित्रांमध्ये फेब्रुवारी महिन्यात जोरदार भांडणदेखील झाले होते.
मंगळवारी रात्रीच्या सुमारास अल्पवयीन मित्राने महेंद्रला फोन करून दगडी खणीजवळ बोलावून घेतले. यावेळी दोघांमध्ये मुलीच्या विषयावरून पुन्हा वाद झाला. संशयिताने रागाच्या भरात महेंद्रचा मोबाईल हिसकावून घेऊन फोडला तसेच दुचाकीची चावीदेखील फेकून दिली. शाब्दिक वादावादीचे रूपांतर हाणामारीवर झाले आणि या झटापटीत संशयित आरोपीने महेंद्रला जोरदार धक्का देत 80 ते 90 फूट खोल खणीत ढकलून दिले.
दरम्यान, महेंद्र घरी न आल्याने नातेवाईक त्याचा शोध घेण्यासाठी बाहेर पडले. यावेळी महेंद्र बेशुद्धावस्थेत खणीत पडलेला सापडला. त्याला तातडीने सीपीआर रुग्णालयात दाखल केले. पण त्याचा मृत्यू झाला होता. या घटनेची माहिती करवीर पोलिसांना मिळताच, पोलिसांनी तपास सुरू केला. कुटुंबीयांकडे चौकशी केली असता, मित्राचा फोन आल्यानंतर महेंद्र बाहेर पडला असल्याची माहिती त्यांनी दिली. महेंद्र आणि संशयित अल्पवयीन मुलाचे मोबाईल लोकेशन डिटेल्स एकच दाखवत होते. यावरून संशयिताला ताब्यात घेऊन कसून चौकशी केली असता, अल्पवयीन आरोपीने खून केल्याची कबुली दिली. संशयित अल्पवयीन मुलाला न्यायालयासमोर हजर केले असता, न्यायालयाने त्याची 15 दिवसांसाठी बालसुधारगृहात रवानगी केली आहे.
