करण जोहर दिग्दर्शित ‘रॉकी और रानी की प्रेम कहानी’ या चित्रपटाचे पोस्टर सोशल मीडियावर झळकले आहे. ‘मिट दि रंधवास’ अशी ओळख करून देणाऱया या पोस्टरमध्ये रणवीर सिंग, धर्मेंद्र, जया बच्चन या प्रसिद्ध चेहऱयासोबतच एक मराठी चेहरा झळकत आहे. हा चेहरा म्हणजे मराठमोळी अभिनेत्री, निर्माती क्षिती जोग. या चित्रपटात क्षिती एका महत्त्वपूर्ण आणि रंजक भूमिकेत दिसणार आहे.
इतक्या मोठय़ा स्टारकास्टसोबत काम करण्याच्या अनुभवाबद्दल क्षिती म्हणते, ‘‘अनेक वर्षे रुपेरी पडद्यावर अधिराज्य गाजवणाऱया कलाकारांसोबत काम करण्याची संधी मला मिळाली आहे ही माझ्यासाठी खूप मोठी गोष्ट आहे. ज्येष्ठच नाही तर आताच्या काळात सुपरहिट असलेला रणवीर सिंग, आलिया भट्ट यांच्यासोबत काम करतानाही धमाल आली. धर्मा प्रॉडक्शन, करण जोहर यांच्यासोबत काम करण्याचा अनुभव अफलातून होता. करण सर एक उत्तम दिग्दर्शक आहेत. समोरच्याकडून अपेक्षित सीन कसा करून घ्यायचा याचे कसब त्यांच्याकडे उत्तम आहे. एकंदरच वातावरण खूप छान होते.’’ हा चित्रपट येत्या 28 जुलै रोजी प्रदर्शित होणार आहे.
