अंधेरी (पश्चिम) येथील स्वामी समर्थ नगर ते विक्रोळी दरम्यान धावणारी मेट्रो 6 ही मार्गिका कांजूरमार्ग येथील मेट्रो कार डेपोशिवायच सुरू होण्याची शक्यता आहे. कंजूरमार्ग येथील डेपो पूर्ण होण्यासाठी किमान 2 ते 3 वर्षांचा कालावधी लागणार असल्याने, मुंबई महानगर प्रदेश विकास प्राधिकरणाने (MMRDA) एक पर्याय शोधला आहे. त्यानुसार विक्रोळीच्या टोकाला देखभालीसाठी आठ लेनचा उंचावरील (एलिव्हेटेड) कॉरिडॉर उभारण्यात येणार असून, त्यात मेट्रो रेक्सच्या दैनंदिन देखभालीसाठी ‘पिट लाईन्स’ असतील.
MMRDA च्या ‘डेपो-फ्री मेट्रो कॉरिडॉर’ संकल्पनेचा हा भाग असून, मेट्रो 6 ही मार्गिका 2026 च्या उत्तरार्धात सुरू करण्याचा मानस आहे. ‘‘रेकच्या नियमित तपासणी व देखभालीसाठी आठ उंचावरील पिट लाईन्स उभारण्यात येणार आहेत. नियोजित मोठ्या दुरुस्तीसाठी (ओव्हरहॉलिंग) रेक्स मंडाळे येथील डेपोमध्ये नेण्यात येतील,’’ अशी माहिती MMRDA च्या अधिकाऱ्यांनी दिली. या उंचावरील डेकचे बांधकाम पूर्व द्रुतगती महामार्गाच्या (ईस्टर्न एक्सप्रेस हायवे) समांतर सुरू झाले आहे.
MMRDA ने यापूर्वी कंजूरमार्ग येथे मेट्रो डेपोकरिता 15 हेक्टर जमीन मागितली होती. मात्र ही जमीन मिठागर (सॉल्ट पॅन) क्षेत्रात येत असल्याने ती सध्या विविध शासकीय प्रक्रियांत अडकली आहे. ‘‘उंचावरील आठ-पिट डेक आणि काही स्थानकांजवळ एकेरी पिट लाईन्स उभारल्यामुळे कंजूरमार्ग डेपोची वाट पाहण्याची गरज राहणार नाही,’’ असे अधिकाऱ्यांनी सांगितले. कंजूरमार्गची जमीन MMRDA कडे हस्तांतरित झाल्यानंतरही डेपो विकसित होण्यासाठी किमान 2 ते 3 वर्षे लागतील, असेही स्पष्ट करण्यात आले.
सूत्रांच्या माहितीनुसार, पूर्व आणि पश्चिम उपनगरांना जोडणाऱ्या 15.31 किलोमीटर लांबीच्या या महत्त्वाच्या मेट्रो मार्गिकेसाठी पुरेसे रेक्स उपलब्ध आहेत. ‘‘सुरुवातीला 6 ते 8 रेक्सची आवश्यकता भासेल. हे रेक्स 6 ते 8 मिनिटांच्या अंतराने सेवा देऊ शकतील. भविष्यात प्रवासी संख्या वाढल्यानंतर कंजूरमार्ग डेपो पूर्ण झालेला असेल,’’ असे MMRDA च्या सूत्रांनी सांगितले.
दरम्यान, या मार्गिकेवरील काही मेट्रो स्थानकांसाठी शासकीय, वनविभागाची तसेच खासगी जमीन मिळवण्याची प्रक्रिया अंतिम टप्प्यात आहे. जोगेश्वरी (पश्चिम) येथील आयआयटी पवई परिसर, कांजूरमार्ग (पूर्व द्रुतगती महामार्गाजवळ) आणि साकी विहार येथील लार्सन अँड टुब्रो परिसरात काही स्थानकांचे काम सुरू आहे. मात्र पादचारी पूल (फुट ओव्हर ब्रिज) उतरण्याच्या ठिकाणी काही लहान भूखंडांची आवश्यकता आहे. या स्थानकांना जोडणारे गर्डर्स आधीच उभारण्यात आले असून स्थानकांचे बांधकाम सुरू आहे.
राज्य सरकारने एप्रिल 2023 मध्ये कंजूरमार्ग येथील मेट्रो डेपोच्या बांधकामासाठी 15 हेक्टर जमीन दिली होती. त्यानंतर मे 2023 मध्ये MMRDA ने संलग्न कामांसाठी आणखी 7 हेक्टर जमीन मागितली होती, ज्याबाबतचा प्रस्ताव अद्याप विचाराधीन आहे. या डेपोच्या बांधकामासाठी 509 कोटी रुपयांचा कंत्राटदार निश्चित करण्यात आला असून, त्यात सीमाभिंत, भराव काम, कार्यशाळा, तपासणी केंद्र, रेक्स उभे करण्यासाठी लाईन्स, स्वयंचलित वॉशिंग प्लांट आणि ऑपरेशन व नियंत्रण केंद्राचा समावेश असणार आहे.
