तमिळनाडूचे मुख्यमंत्री आणि द्रमुक अध्यक्ष एम. के. स्टॅलिन यांनी रविवारी केंद्रातील एनडीए सरकारवर तीव्र शब्दांत टीका केली. निवडणुकांच्या काळात तमिळ संस्कृतीबद्दल केवळ बेगडी प्रेम दाखवायचे आणि प्रत्यक्षात तमिळनाडूच्या हिताच्या विरोधात काम करायचे, अशी दुटप्पी भूमिका एनडीए घेत असल्याचा आरोप त्यांनी केला. विरुधुनगर येथील जाहीर सभेत बोलताना ते असे म्हणाले आहेत.
यावेळी बोलताना स्टॅलिन म्हणाले की, “आश्वासने कोणीही देऊ शकते, परंतु तमिळनाडूची जनता केवळ द्रमुकने दिलेल्या शब्दावरच विश्वास ठेवते.” यावेळी त्यांनी एडप्पाडी के. पलानीस्वामी यांच्यावरही टीका केली. पलानीस्वामी यांनी भाजपशी हातमिळवणी केल्याने राज्याच्या विकासात अडथळे येत असल्याचे त्यांनी म्हटले आहे.
तमिळनाडू विरुद्ध दिल्ली असा लोकशाही लढा
या निवडणुकीला त्यांनी ‘तमिळनाडू विरुद्ध दिल्ली’ असा लोकशाही लढा संबोधत, मतदारांना धर्मनिरपेक्ष प्रगतीशील आघाडीला पाठिंबा देण्याचे आवाहन केले. पेरियार, ई.व्ही. रामासामी आणि के. कामराज यांसारख्या नेत्यांच्या ऐतिहासिक संदर्भांचा उल्लेख करत त्यांनी तमिळ अस्मितेच्या रक्षणावर भर दिला. ‘द्रविडीयन मॉडेल २.०’ अंतर्गत पुढील काळात राज्याचा विकास अधिक वेगाने होईल आणि ही सत्ता मागील सर्व यशांचे विक्रम मोडीत काढेल, असा विश्वासही त्यांनी यावेळी व्यक्त केला.
