मुंबईतील दोन बॉम्बस्फोट आणि इसिस दहशतवादी मॉड्युल प्रकरणातील साकीब नाचनचा शनिवारी मृत्यू झाला. साकीबला सोमवारी ब्रेन स्ट्रोक आला. त्यामुळे त्याला उपचारासाठी दिल्लीतील दीनदयाळ रुग्णालयात अतिदक्षता विभागात दाखल करण्यात आले होते. उपचारादरम्यान त्याचा मत्यू झाला. साकीबच्या मृत्यूचे वृत्त धडकताच भिवंडी पडघ्यातील बोरीवली गावात पोलिसांचा कडक बंदोबस्त तैनात करण्यात आला आहे
साकीब हा सिमी या बंदी घातलेल्या संघटनेचा माजी पदाधिकारी होता. तसेच मुंबईतील बॉम्बस्फोटासह दिल्ली-पडघा इसिस दहशतवादी मॉड्युल प्रकरणातील प्रमुख आरोपी होता. इसिसशी संबंधित सदस्यांना मदत केल्याच्या आरोपाखाली नाचन याची चौकशी सुरू होती. नाचन तिहार तुरुंगात शिक्षा भोगत होता. सोमवारी त्याला ब्रेन स्ट्रोक आल्याने रुग्णालयात नेण्यात आले, तेथे उपचारादरम्यान त्याचा मृत्यू झाला.
भिवंडीतील पडघा येथील बोरिवली गावातील रहिवासी होता. साकिब नाचन हा सुरुवातीला सिमीचा कार्यकर्ता म्हणून काम करत होता. त्यानंतर तो सिमी चा पहिला अध्यक्ष बनला. 2002 च्या मुंबईतील साखळी बॉम्बस्फोटात साकिब नाचन याला दहा वर्षांची शिक्षा झाली. त्यानंतर तो जामिनावर सुटला होता. इसीसचे मॉड्युल हिंदुस्थानात राबवण्यासाठी साकीबने नेटवर्क तयार केले होते. खलिस्तानवाद्यांशी कनेक्शन असल्याचे सिद्ध झाल्यामुळे साकीबला अटकही झाली होती.
