शिवसेनाप्रणित स्थानीय लोकाधिकार समिती महासंघाच्या वतीने मराठी भाषा दिनानिमित्त मुंबईत भव्य सोहळा आयोजित करण्यात आला आहे. हा कार्यक्रम गुरुवार, 27 फेब्रुवारी रोजी सायंकाळी 6 ते रात्री 9 या वेळेत न्यू मरीन लाइन्स येथील बिर्ला मातोश्री सभागृहात होणार आहे. या कार्यक्रमास प्रमुख मार्गदर्शक म्हणून शिवसेना पक्षप्रमुख उद्धव ठाकरे उपस्थित राहणार आहेत. शिवसेना नेते, युवासेना प्रमुख आदित्य ठाकरे यांचीही उपस्थिती असणार आहे.
शिवसेनेने केलेल्या भक्कम पाठपुराव्यामुळे मराठीला अभिजात भाषेचा दर्जा केंद्र सरकारने घोषित केला. या पार्श्वभूमीवर यंदाचा ज्येष्ठ साहित्यिक कुसुमाग्रज अर्थात वि. वा. शिरवाडकर यांचा जन्मदिवस ‘मराठी भाषा दिवस’ म्हणून यंदाही जल्लोषात साजरा करण्यात येणार आहे. या संदर्भात शिवसेना भवन येथे आज लोकाधिकार समिती महासंघ व संलग्न समिती पदाधिकाऱयांची बैठक आयोजित केली होती. या बैठकीत शिवसेना नेते, स्थानीय लोकाधिकार समिती महासंघाचे अध्यक्ष-खासदार अनिल देसाई यांनी उपस्थितांना कार्यक्रमाच्या नियोजनाबाबत सूचना दिल्या. मराठी भाषा दिवसाचा कार्यक्रम समितीच्या चळवळीच्या इतिहासात कार्यक्रमाची नोंद होईल असा प्रयत्न सर्व कार्यकर्त्यांनी करावा तसेच या कार्यक्रमात कार्यकर्त्यानी मोठय़ा संख्येने उपस्थित राहावे, असे आवाहन त्यांनी केले.
संपूर्ण परिसर होणार भगवामय
या कार्यक्रमाचे आयोजन स्थानीय लोकाधिकार समिती महासंघाचे अध्यक्ष, शिवसेना सचिव-खासदार अनिल देसाई, महासंघाचे कार्याध्यक्ष विलास पोतनीस, महासंघाचे कार्याध्यक्ष आमदार सुनील शिंदे आणि महासंघाचे सरचिटणीस प्रदीप मयेकर यांच्या नेतृत्वाखाली करण्यात आले असून कार्यक्रमाच्या नियोजनासाठी महासंघ पदाधिकारी आणि संलग्न समित्यांचे पदाधिकारी परिश्रम घेत आहेत. समित्यांचे पदाधिकारी कार्यक्रम स्थळाच्या परिसरात भगवे झेंडे, पताका आणि मराठी भाषा दिवसाचे बॅनर्स लावून संपूर्ण परिसर भगवामय करणार आहेत.
