चमकोगिरीसाठी शिवसेना नेते, खासदार संजय राऊत यांच्या विरोधात मीडियासमोर केलेली बेताल बडबड भाजप आमदार नितेश राणे यांच्या चांगलीच अंगलट आली आहे. अब्रुनुकसानीच्या खटल्याप्रकरणी नितेश राणे 28 जुलै रोजी माझगाव कोर्टात व्यक्तिशः हजर राहणार असून तशी हमी राणेंच्या वकिलांनी आज माझगाव दंडाधिकारी न्यायालयात दिली.
महाराष्ट्रात लवकरच राजकीय भूपंप होणार…, खासदार संजय राऊत हे राष्ट्रवादी काँग्रेसमध्ये प्रवेश करणार असे निराधार दावे करीत नितेश राणे सैरभर बरळले होते. त्यांनी एका वृत्तवाहिनीशी बोलताना खासदार संजय राऊत यांच्याबाबत बदनामीकारक विधाने केली. याप्रकरणी खासदार राऊत यांनी नितेश राणे यांच्याविरुद्ध माझगाव दंडाधिकारी न्यायालयात अॅड. मनोज पिंगळे यांच्यामार्फत अब्रुनुकसानीचा खटला दाखल केला आहे. या खटल्यावर शुक्रवारी महानगर दंडाधिकारी आरती कुलकर्णी यांच्यासमोर सुनावणी घेण्यात आली.
