प्रतिबंध असतानाही यूएईच्या खोट्या नावाखाली न्हावाशेवा बंदरात आयात करण्यात आलेला ८०० मेट्रिक टन पाकिस्तानी माल जप्त करण्यात आला. मुंबई महसूल गुप्तचर संचालनालयाने ही कारवाई केली. जप्त करण्यात आलेल्या २८ कंटेनरमध्ये पाकिस्तानी बनावटीची सौंदर्य प्रसाधने आणि सुक्या खजुराचा समावेश असून जप्त करण्यात आलेल्या मालाची किंमत १२ कोटी आहे. याप्रकरणी दोन आरोपींना डीआरआयच्या अधिकाऱ्यांनी अटक केली आहे.
याआधीही जुलै २०२५ मध्ये मुंबई डीआरआयने ‘ऑपरेशन डीप मॅनिफेस्ट’ मोहीम सुरू केल्यानंतर ९ कोटी रुपयांच्या १११५ मेट्रिक टन मालाचे ३९ कंटेनर जप्त करून एका आयातदाराला अटक केली होती. या कठोर उपायांनंतरही अवैध मार्गाने ८०० मेट्रिक टन पाकिस्तानी माल न्हावाशेवा बंदरात आणण्यात आला. मात्र महसूल गुप्तचर संचालनालयाला याची कुणकुण लागताच पाकिस्तानी बनावटीची सौंदर्य प्रसाधने आणि सुक्या खजुराचे २८ कंटेनर जप्त करण्यात आले. पाकिस्तानी सौंदर्य प्रसाधनांच्या प्रकरणात मूळ देशाबाबत खोटी माहिती जाहीर करून तस्करी करण्यात मदत करणाऱ्या एका दलालालाही अटक करण्यात आली असल्याची माहिती डीआरआयच्या अधिकाऱ्यांनी दिली.
आयातीवर पूर्ण बंदी
पहलगाम दहशतवादी हल्ल्यानंतर २ मे २०२५ पासून केंद्र सरकारने पाकिस्तानमधून येणाऱ्या वस्तूंच्या थेट किंवा अप्रत्यक्ष आयातीवर पूर्णपणे बंदी घातली आहे. या निर्णयानंतर महसूल गुप्तचर संचालनालयाने (डीआरआय) पाकिस्तानी बनावटीच्या वस्तूंची आयात थांबवण्यासाठी आणि त्या जप्त करण्यासाठी ‘ऑपरेशन डीप मॅनिफेस्ट’ ही मोहीम सुरू आहे. या मोहिमेंतर्गत पाकिस्तानचे २८ कंटेनर जप्त करण्यात आले.
दुबई कनेक्शन उघड
पाकिस्तानी सुका खजूर आणि सौंदर्य प्रसाधने दुबईतील जेबेल अली बंदरातून न्हावाशेवा बंदरात आणली होती. तपासणीत हा माल प्रत्यक्षात पाकिस्तानमधून आल्याचे समोर आले. या प्रकरणात दुबईमध्ये राहणाऱ्या एका हिंदुस्थानी पुरवठादाराला अटक केली आहे. हा पुरवठादार आपल्या कंपन्यांचा वापर वाहतुकीचा मार्ग लपवण्यासाठी करत होता. त्याच्यामार्फत हिंदुस्थानातून पाकिस्तानमध्ये पैशांची उलाढाल होत होती.
