सोशल मीडियावर वेगवेगळ्या रिल्स शेअर करून प्रसिद्धीच्या झोतात आलेली पंजाबची इन्फ्लुयन्सर कमल कौर भाभी उर्फ कांचन कुमारा हिचा संशयास्पद मृत्यू झाला आहे. भटिंडा येथील आदेश मेडिकल विद्यापीठातील पार्किंगमध्ये उभ्या असलेल्या कारमध्ये कमल कौर हिचा मृतदेह आढळून आल्याने खळबळ उडाली आहे. पोलिसांनी तिचा मृतदेह ताब्यात घेऊन शवविच्छेदनासाठी पाठवला आहे. ही हत्या आहे की आत्महत्या हे शवविच्छेदनाचा अहवाल आल्यानंतरच स्पष्ट होईल.
मिळालेल्या माहितीनुसार, भटिंडाच्या आदेश मेडिकल विद्यापीठाच्या परिसरात उभ्या कारमध्ये एका महिलेचा मृतदेह आढळून आला होता. ही कार बराच काळापासून पार्किंगमध्ये उभी होती. दुर्गंधी येऊ लागल्याने स्थानिकांनी याची माहिती पोलिसांना दिली. माहिती मिळताच पोलिसांनी घटनास्थळी धाव घेत गाडीचा दरवाजा उघडला आणि आत इन्फ्ल्युयन्सर कमल कौर हिचा मृतदेह आढळला.
पार्किंगमधील गाडीमध्ये आढळलेल्या मृतदेहाची पोलीस चौकशीदरम्यान ओळख पटली. सोशल मीडियावर जवळपास 4 लाख फॉलोअर्स असलेली कमल कौर भाभी हिचा तो मृतदेह असल्याचे स्पष्ट झाले. ज्या कारमध्ये तिचा मृतदेह आढळला ती कारही तिच्याच नावावर रजिस्टर असल्याचेही समोर आले. प्राथमिक चौकशीत तिच्या शरीरावर मारहाणीच्या कोणत्याही खुणा नव्हत्या. त्यामुळे ही हत्या की आत्महत्या हे स्पष्ट झालेले नाही. पोलीस अधिक तपास करत आहेत.
कोण होती कमल कौर?
कमल कौर ही लुधियानाची रहिवासी होती. इन्स्टाग्रामवर वादग्रस्त आणि अश्लील रिल्स ती बनवत होती. इन्स्टावर तिचे 3.86 लाख फॉलोअर्स होते. अश्लील कंटेंट शेअर करत असल्याने सात महिन्यांपूर्वी तिला दहशतवादी अर्श डल्लाने जिवे मारण्याची धमकी दिली होती. तसेच दोन दिवसांपूर्वी तिने एक पोस्टही शेअर केली होती. आता तिचा मृतदेह आढळून आला आहे.
View this post on Instagram
भटिंडाचे पोलीस अधीक्षक नरेंद्र सिंह यांनी याबाबत माहिती देताना सांगितले की, बुधवारी रात्री भटिंडा आदेश मेडिकल विद्यापीठाच्या पार्किंगमध्ये उभ्या कारमध्ये एका महिलेचा मृतदेह आढळला. ही गाडी बऱ्याच काळापासून इथे उभी होती आणि आजूबाजूच्या लोकांना वास येऊ लागल्याने हा प्रकार उघडकीस आला. मृताची ओळखही पटली असून हा मृतदेह प्रसिद्ध इन्फ्लुयन्सर कमल कौरचा असल्याचे समोर आले.
