छत्रपती शिवाजी महाराजांचा ज्येष्ठ शुद्ध त्रयोदशी शिवशक 352 या तिथीनुसार साजरा केला जाणारा शिवराज्याभिषेक दिन सोहळा सोमवार 9 जून रोजी किल्ले रायगडावर साजरा होणार आहे. हा सोहळा आपल्या डोळ्यांमध्ये साठवण्यासाठी महाराष्ट्राच्या कानाकोपऱ्यातून हजारोंच्या संख्येने शिवभक्त किल्ले रायगडावरती दाखल झाले आहेत. राज्याभिषेक सोहळ्याच्या पूर्व दिनी शिरकाई देवीच्या पूजनापासून या सोहळ्याला सुरुवात झाला असून शिवभक्तीच्या जागरात संपूर्ण रायगड दुमदुमून गेल्याचे चित्र पाहायला मिळत आहे. शिवराज्याभिषेक दिनोत्सव सेवा समिती दुर्गराज रायगड व कोकणकडा मित्र मंडळ, रायगड यांच्या वतीने या सोहळ्याचे आयोजन करण्यात आले आहे.
