अजगणी येथील विस्तारित लोटे वसाहतीमधील 88 एकर जमिनीवर होत असलेल्या कोका कोला कंपनीच्या प्रकल्पात स्थानिक भूमिपुत्रांवर होत असलेल्या अन्यायाच्या निषेधार्थ अजगणी ग्रामस्थांनी आज मूक मोर्चा काढून आपला आक्रोश व्यक्त केला आहे.
लोटे वसाहतीच्या विस्तारित जागेत गतवर्षी भूमिपूजन झालेल्या कोको कोला या प्रकल्पाच्या कामात स्थानिक प्रकल्पग्रस्थांना सामावून घेण्याचे आश्वासन उद्योगमंत्री तथा पालकमंत्री उदय सामंत यांनी दिले होते. मात्र ते आश्वासन देखील हवेत विरले आहे. कंपनीमधील नोकरभरती संदर्भात नोव्हेंबर 2024 पासून अजगणी ग्रामपंचायतीच्या माध्यमातून पत्रव्यवहार सुरू करण्यात आला. याला कंपनी प्रशासन जुमानत नसल्याने उद्योगमंत्री यांच्या दालनात याबाबत अनेक बैठका घेण्यात आल्या तरीही कोका कोला प्रशासन स्थानिकांना सामावून घेत नाही. प्रशासनाने विविध ट्रेड केलेल्या 200 लोकांचे बायोडाटा घेतले. मात्र त्यातल्या एकालाही कामावर घेण्यात आलेले नाही. मग स्थानिकांनी जायचे कुठे? आमच्या जागा घेऊन होणाऱया कारखान्यांवर बाहेरून येणारे लोक पोट भरत असतील तर आम्ही याबाबत गप्प बसणार नसल्याचा इशारा यावेळी ग्रामस्थांनी दिला आहे.
