विरार रमाबाई इमारत दुर्घटना ताजी असतानाच आता पुन्हा एकदा विरार पश्चिमेच्या डोंगरपाडा परिसरात जीर्ण इमारतीचा स्लॅब कोसळला आहे. रविवारी सकाळी 11.30 च्या सुमारास ही घटना घडली. यात दोनजण गंभीर जखमी झाले असून त्यांना उपचारासाठी रुग्णालयात दाखल करण्यात आले आहे. पालिकेने नोटीस बजावूनही इमारतीची दुरुस्ती न केल्याने ही दुर्घटना घडली आहे.
वसई-विरार महापालिकेने शहरातील धोकादायक इमारतींना दुरुस्त करण्याच्या नोटिसा बजावल्या आहेत. दुर्घटनाग्रस्त इमारत ही 30 वर्षांपेक्षा जास्त जुनी असून एप्रिल महिन्यात इमारतीला महानगरपालिकेने स्ट्रक्चरल ऑडिट करण्यासाठी नोटीस बजावली होती. अहवालानुसार सदर इमारत ही सी२ए या श्रेणीत मोडत असल्याने इमारत दुरुस्ती करणे आवश्यक होते. परंतु इमारतीमधील रहिवासी, विकासक यांच्यामधील अंतर्गत वादामुळे इमारत दुरुस्तीचे काम करण्यात आले नव्हते, अशी माहिती महापालिकेने दिली आहे.
इमारत रिकामी केली
श्री गणेश को-ऑपरेटिंव्ह हाऊसिंग सोसायटी असे या चार मजली इमारतीचे नाव आहे. यात १७ कुटुंबे राहत होती. ही इमारत अनेक वर्षे जुनी झाली असल्याने रविवारी सकाळी अचानक या इमारतीच्या पहिल्या मजल्यावर असलेल्या एका सदनिकेचा स्लॅब कोसळला. यात दोन जण जखमी झाले असून त्यांना उपचारासाठी रुग्णालयात दाखल करण्यात आले आहे. या घटनेची माहिती महापालिकेच्या अग्निशमन दल व अधिकाऱ्यांना मिळताच घटनास्थळी पोहोचून इमारतीत राहणाऱ्या नागरिकांना सुरक्षितपणे बाहेर काढण्यात आले.
