सोहराबुद्दीन शेख एन्काउंटर हा बनावटच होता, त्याच्यासह त्याची पत्नी कौसर बीची गुजरात आणि राजस्थान पोलिसांनी मिळून हत्या केली तसेच या हत्येनंतर सोहराबुद्दीनचा साथीदार तुलसीराम प्रजापती आणि त्यांच्या कुटुंबियांचा पोलिसांनी छळ केल्याचा युक्तिवाद याचिकाकर्त्यांच्या वतीने आज हायकोर्टात करण्यात आला.
सोहराबुद्दीन शेख बनावट चकमक प्रकरणी गुजरातमधील आयपीएस अधिकारी राजकुमार पांडियन यांच्यासह डी.जी. वंझारा, एम.एन. दिनेश आणि गृह मंत्री अमित शहा यांच्याविरोधात गुन्हे दाखल करण्यात आले होते, मात्र यातील काही अधिकाऱयांची या खटल्यातून निर्दोष सुटका करण्यात आली. सत्र न्यायालयाच्या या निर्णयाला सोहराबुद्दीनचा भाऊ रुबाबुद्दीन शेख याने हायकोर्टात ऍड. गौतम तिवारी यांच्यामार्फत आव्हान दिले असून आज शुक्रवारी मुख्य न्यायमूर्ती श्री चंद्रशेखर आणि न्यायमूर्ती गौतम अनखड यांच्या खंडपीठासमोर त्यावर सुनावणी घेण्यात आली. अंतिम युक्तिवादाला सुरुवात झाली असून याचिकाकर्त्यांतर्फे गौतम तिवारी यांनी युक्तिवाद करताना खंडपीठाला सांगितले की, गुजरात पोलिसांनी सोहराबुद्दनीला ताब्यात घेऊन त्याची बनावट एन्काउंटरमध्ये हत्या करण्यात आली.
