दोन वर्षापुर्वी महापालिकेने मोठय़ा पुलांचे स्ट्रक्चरल ऑडीट केल्यानंतर अकरा पुलांची कामे पुर्ण केली गेली आहे. मात्र, आता शहरातील जुन्या सुमारे साडेसहाशे पुलांचे आणि कल्व्हर्टचे स्ट्रक्चरल ऑडीट हे तज्ञ सल्लागाराच्या नेमणुकीअभावी रखडली आहे. त्यामुळे सल्लागारांच्या भरोशावर सुरू असलेल्या महापालिकेचा कारभार कधी सुधारणार असा सवाल आता उपस्थित झाला आहे.
मावळ तालुक्यातील कुंडमळा येथील पुल पडल्याच्या पार्श्वभुमीवर पुणे शहरातील पूल आणि कल्व्हर्टच्या स्ट्रक्चरल ऑडीटचा मुद्दा समोर आला. शहरातून मुळा आणि मुठा या दोन मोठय़ा नद्या, राम नदी तसेच आंबिल ओढा, माणिक नाला, भैरोबा नाला, नागझरी आदी मोठे ओढेही आहेत. या नदी आणि ओढय़ांवर पुलांची उभारणी केली गेली आहे. गेल्या काही वर्षांत पावसाचे स्वरुप बदलले आहे. कमी वेळात जास्त पाऊस पडण्याच्या घटना घडत आहे. मात्र, शहरातील पुलांच्या स्ट्रक्चरल ऑडिटचा विषय अद्याप तज्ञ सल्लागार नियुक्त करण्यावरच अडकून पडला आहे.
