कणकवली शहरातील कनगरनगर येथील समृद्धी कोरगावकर यांच्या घरफोडीच्या गुन्ह्यातील संशयितच्या मुसक्या आवळण्यात एलसीबी व कणकवली पोलिसांना यश आले. हा गुन्हा दाखल झाल्यापासून अवघ्या 16तासांत संशयित आरोपीला पोलिसांच्या पथकाने ताब्यात घेतले.
शहरातील कनकनगर येथील परिचारिका समृद्धी मिलिंद कोरगावकर या शिरगाव प्राथमिक आरोग्य केंद्रात 7 जून रोजी नाईट ड्युटीसाठी गेल्या होत्या. तर त्यांचे पती मिलिंद हे आपल्यावडील आणि मुलासोबत आपल्या मालवण येथील बहिणीकडे गेले होते. रविवारी 8 जून रोजी सकाळी नऊ वाजता ड्युटीवरून आल्यानंतर समृद्धी यांना आपल्या बंद घराचे कुलूप तोडून चोरी झालेली दिसली. चोरट्याने साडेतीन लाखांचा ऐवज चोरल्याची फिर्याद समृद्धी कोरगावकर यांनी कणकवली पोलीस ठाण्यात दाखल केली होती.
दरम्यान याच चोरीचा छडा लावण्यासाठी एलसीबी आणि कणकवली पोलीस ठाण्याच्या पोलीस अधिकारी कर्मचाऱ्यांचे पथक चोरट्याच्या मागावर होते. मानवी कौशल्य आणि पणजी शहरात पायी गस्त घालून एलसीबी आणि पोलिसांनी अवघ्या 16 तासांत संशयित आरोपीच्या मुसक्या आवळल्या आहेत. चोरलेल्या मोबाईलच्या लोकेशनद्वारे पोलिसांनी सापळा रचून ताब्यात घेतले. संतोष वसंत सुतार (48, रा. संगमेश्वर, जि. रत्नागिरी) असे या संशयिताचे नाव आहे. पोलिसांनी त्याच्याकडून दागिने हस्तगत केले आहेत. दरम्यान, मंगळवारी त्याला येथील न्यायालयात हजर केले जाणार आहे.
कारवाई पोलीस अधीक्षक डॉ. मोहन दहिकर, अतिरिक्त पोलीस अधीक्षक कृषिकेश रावले, डीवायएसपी घनःश्याम आढाव यांच्या मार्गदर्शनाखाली एलसीबीचे पोलीस निरीक्षक राजेंद्र पाटील, कणकवली पोलीस निरीक्षक मारुती जगताप यांच्या सुचनेनुसार कणकवली पोलीस उपनिरीक्षक अनिल हाडळ, एलसीबी पीएसआय रामचंद्र शेळके, समीर भोसले, हवालदार पांडुरंग पांढरे, हवालदार डॉमनिक डिसोझा, हवालदार जॅक्सन घोंसालवीस, हवालदार आशिष जामदार यांच्या पथकाने केली. तपास अनिल हाडळ करीत आहेत.
