नौपाड्यातील बेकायदा गाळे हटविण्यासाठी घेतलेल्या लाचप्रकरणी अटकेत असलेले ठाणे महापालिकेचे लाचखोर उपायुक्त शंकर पाटोळे यांना आज न्यायालयीन कोठडी सुनावली आहे. त्याचबरोबर डाटा ऑ परेटर ओमकार गायकर, ‘कलेक्टर’ सुशांत सुर्वे यांचीदेखील तुरुंगात रवानगी करण्यात आली आहे. ठाणे जिल्हा व अतिरिक्त सत्र न्यायाधीश एस. एस. शिंदे यांच्या न्यायालयात आज सुनावणी झाली. दरम्यान, तिघांच्या वकिलाने जामिनासाठी अर्ज केला असून त्याच्यावरील सुनावणी येत्या बुधवारी होणार आहे.
1 ऑक्टोबरला उपायुक्त पाटोळे आणि गायकर या दोघांना लाच घेतल्याप्रकरणी अटक करण्यात आली. दोघांना दोन दिवसांची पोलीस कोठडी सुनावली होती. दरम्यान, सुशांत सुर्वे याला अटक करण्यात आल्यावर त्याला तीन दिवसांची पोलीस कोठडी सुनावली. आज तिघांची पोलीस कोठडी संपल्याने त्यांना न्यायालयात हजर केले. अतिरिक्त सत्र न्यायाधीश शिंदे यांनी कोणताही विलंब न करता त्या तिघांची रवानगी न्यायालयीन कोठडीत करण्यात आली. यावेळी सरकारी वकील म्हणून संजय लोंढे आणि पाटोळे यांचे वकील विशाल भानुशाली हजर होते.
